Дьокуускайга ох саанан ытыыга рекорднай ахсааннаах оҕо күрэхтэһиэҕэ

Бу өрөбүллэргэ Дьокуускай куорат «Дохсун» успуорт уораҕайыгар оҕолорго ох саанан ытыыга «Саха сирин эрэлэ» диэн улахан күрэхтэһии ыытыллыаҕа. Бу туһунан Өрөспүүбүлүкэтээҕи Ох саанан ытыыга Федерацията иһитиннэрэр.

Күрэхтэһии Саха сирин үүнэн иһэр көлүөнэтин ортотугар саамай улахан тэрээһин буолар.

• Кыттааччы ахсаана: 323 оҕо — бу муҥутуур үрдүк көрдөрүү.
• Хамаанда: 12 улуустан уонна оройуонтан кэлбит бөлөхтөр.
• Наҕараада: 11 дьиссипилиинэҕэ 38 мэтээл кэмпилиэгэ оонньонуоҕа.

«Саха сиригэр ох саанан ытыы билигин күүскэ сайда турар. Биһиэхэ олус күүстээх, кэскиллээх көлүөнэ улаатан эрэр. Спортсменнарбыт сүрүн сыаллара – Арассыыйа сүүмэрдэммит хамаандатын састаабыгар киирэн Олимпийскай оонньууларга кыттыы. Баҕар, бу “Саха сирин эрэлэ” күрэхтэһии кыттыылаахтарыттан ким эрэ кэлин Олимпиада пьедесталыгар туруоҕа», – диэн бэлиэтээтэ Саха сиринээҕи Ох саанан ытыыга Федерациятын бэрэссэдээтэлэ Василий Ефимов.

Маннык үрдүк таһымнаах турниры тэрийиигэ күүс-көмө буолбут партнёрдарынан «АЙАН» ТК, «Северснаб» ХЭТ (ООО) уонна Юрий Гагарин аатынан Саха сиринээҕи өрөспүүбүлүкэтээҕи типография буоллулар.