Суол оллурун-боллурун ким ыраастыырый?

Күһүн, кыһын хаар түстэҕинэ, ириэрдэҕинэ, суолга муус-хаар бөлтөркөйдөр үөскээн, массыынаҕа да, сатыы дьоҥҥо да мэһэйдииллэр. Уулусса оллурун-боллурун хайдах көннөрөллөрүй?

Ааспыт нэдиэлэҕэ куорат суолга сулууспалара 102 уулуссаны, уопсайа 154 килэмиэтири ыраастаатылар. Бу туһунан суол инфраструктуратыгар, тырааныспарга департаменын начаалынньыга Эдуард Садовников кэпсээтэ.

Уулуссалары ыраастааһын кыраапык быһыытынан ыытыллар. Дьокуускай уулуссаларын уопсай уһуна 600 килэмиэтир, онон ыраастааһын үлэтин түһүмэҕинэн ыыталлар.

Күн-дьыл туруга уларыйдаҕына, хаар түстэҕинэ, үлэ күүһүрэр. Өрөбүллэргэ, түүн да үлэ тохтообот. Наада буоллаҕына, эбии үлэлиир бөлөхтөрү тэрийэллэр. Суолга үөскээбит муус оллуру-боллуру анал тиэхиньикэнэн астараллар, халтарааҥҥа кумаҕы куталлар.

Дьокуускай олохтоохторо ханна эрэ уулусса ыраастаммакка хаалбытын биллэрдэхтэринэ, департамент суһаллык быһаарыы ылыныан сөп.