Сыл саҕаланыаҕыттан 20 тиэхиньикэ байыаннай дьайыы сиригэр ыытылынна

Сыл саҕаланыаҕыттан Саха сириттэн байыаннай дьайыы сиригэр  20 тиэхиньикэ уонна   67  туонна кэриҥэ  гуманитарнай көмө ыытылынна.  Бу туһунан өрөспүүбүлүкэтээҕи хамыыһыйа Координационнай киинин бэрэстэбиитэлэ Анна Меркурьева брифиҥҥэ эттэ.

«Бу нэдиэлэҕэ өрөспүүбүлүкэттэн үс тиэхиньикэни уонна  волонтерскай  хамсааһыннартан  биэс туонна кэриҥэ  гуманитарнай көмөнү тиэммит өссө биир  ыарахан уйуктаах массыына ыытылынна. Бүгүн, олунньу 19 күнүгэр, өссө үс тиэхиньикэни уонна гуманитарнай көмөнү ыытаары тиэйии үлэтэ саҕаланна.  Аара айаннаан иһэн өссө  гуманитарнай көмөнү хомуйуохтара.  Алдан уонна Нерюнгри куораттартан», — диэн Координационнай киин бэрэстэбиитэлэ иһитиннэрдэ.

Аҕа дойдуну көмүскээччи күнүгэр аналлаах ас-үөл  набордара Хабаровскай уонна Приморскай кыраай, Амурскай уобалас, Москва, Санкт-Петербург, Улан-Удэ, Чита госпиталларыгар  тиэрдиллибиттэрин бэлиэтээтэ.

«Саха сиригэр уоппускаҕа сылдьар байыаннай сулууспалаахтар Дьокуускай куоракка, Аммосов уулусса 18 нүөмэрдээх дьиэтигэр баар пуунтан  (2/4 кэб.) бэлэхтэрин ылыахтарын сөп. Бэйэҕитин кытары дастабырыанньаҕытын уонна уоппуска  пропуһун  илдьэ кэлиэхтээххит«, — диэн быһаарда Анна Меркурьева.