Туристар Уус-Ньараҕа 2111 м үрдүктээх Үрбэ хайатын дабайыахтара

Кулун тутар 28-29 күннэригэр Өймөкөөн улууһун киинигэр Уус-Ньараҕа аан бастаан скайраннинг диэн хайаҕа ыттыы күрэҕэ буолаары турар.

Бу маннык спортивнай көрүҥ сүүнэ улахан очуос хайа дойдутугар соҕотох Өймөкөөҥҥө эрэ ыытыллар. Ол да иһин буолуо, Алдантан хайыһар баазатыттан, Владивостоктан уончалыы киһилээх кыттааччы кэлэн күрэстэһэр былааннаах.

— 2111 м үрдүктээх  Үрбэ хайатын сатыы дабайыыга 21  турист суруттарда. Онон бу күннэргэ хайаҕа ыттар ыллык суолу бэлэмнээтибит. Скайраннинг курдук хайаны дабайыы Өймөкөөҥҥө эрэ ыытыллар буолан, үгүс киһи кэрэхсиир. Бу спортивнай көрүҥ сотору дойду таһымыгар тахсыаҕа. Оннук соруктаах үлэлиибит, — диэн сахаттан бастакынан Эверест хайатыгар ыттыбыт альпинист, Өймөкөөн улууһун дьаһалтатын култуура уонна туризм сайдыытыгар управление туризм салаатын салайар Евгений Кривошапкин билиһиннэрдэ. Онон бириэмэ өссө да баар. Үрдүгүнэн аатырбыт Үрбэ очуос хайатын сатыы дабайыан баҕалаахтар Уус-Ньараҕа тиэтэйиҥ.