“Уол оҕо — эрэлбит” күрэхтэһии буолан ааста

Аҕа дойдуну көмүскээччилэр күннэригэр анаан ыраах хоту Дьааҥы үрэҕин үрдүгэр турар Усуйаана улууһун Усуйаана нэһилиэгэр улахан кылаас уолаттарыгар “Уол оҕо – эрэлбит” күрэс буолан ааста.

Күрэскэ биэс уол кытынна: Сыроватскай  Антон, Горохов Саян, Сыроватскай  Валентин, Горохов Сахаян, Батюшкин Ньургун. Уолаттар араас түһүмэхтэри аастылар. Ол курдук,  саха төрүт оонньууларыттан саҕалаан, ырыа да ыллаан дьиэрэттилэр,  кыыс суһуоҕун да өрдүлэр, гречка хааһыны да сиэтилэр. Оҕолорбут бэйэлэрин кыахтарын, талааннарын көрдөрөн  көрөөччүлэри сэҥээртилэр. Күүстээх күөн күрэс түмүгэр 1 миэстэни Антон Сыроватскай ылыан ылла. Саян Горохов иккис, Сахаян Горохов үһүс миэстэ буоллулар.

Күөн күрэһи “Кэскил” култуура үлэһиттэрэ Елена Кирилловна Барабанская, Юрико Евгеньевна Дохунаева иилээн-саҕалаан ыыттылар, Тоскина Агафья Васильевна уонна Надежда Егоровна Горохова дьүүллүүр сүбэҕэ үлэлээтилэр, Ирина Ивановна  Корякина, Татьяна  Егоровна Горохова тэрээһиммитин ылбаҕай ырыаларынан киэргэттилэр. Күрэскэ көхтөөхтүүк кыттыбыт оҕолорбутугар, инники эрэллэрбитигэр махтанабыт. Баҕарабыт куруук ыраас халлааны, үөрэххитигэр үрдүк ситиһиилэри,  доруобуйаны, эрэллээх доҕоттору!