Устудьуоннар тутар этэрээттэрин бэтэрээннэрин бастакы сүлүөтэ буолан ааста

Бэҕэһээ былыттаах, ардахтаах күн да буоллар, өрөспүүбүлүкэтээҕи устудьуоннар тутар этэрээттэрин бэтэрээннэрин 1 сүлүөтэ буолан ааста. Үөрэммит Сэргэлээхпитигэр, тутар этэрээт пааматынньыгар  бары ИФФ үөрэммиттэр мустан, этэрээттэринэн  долгутуулаах, уопсай хаартыскаҕа түһүү буолла.

Бэйэбит байыастарбыт  “Чэчир” этэрээппитигэр утуу-субуу элбэх киһи түмүстүбүт. «Орто Дойдуга» оптуобустарынан айаннаатыбыт. Олус кэрэ айылҕалаах «Орто Дойдуга» үс ураһаны үллэстэн олохсуйдубут. Ардах, тыал да диэбэккэ, бэтэрээн устудьуон халыҥ аармыйата параакка кытынна. СГУ-га бастакынан тэриллибит “Софим» этэрээт бары үтүө дьыалаҕа инники күөҥҥэ сылдьарын, хайдахтаах курдук  Учуутал уонна уһуйааччы, Үлэ сылларыгар чахчы да холобур буолар үтүө дьыалалары, автопробегтары, көрсүһүүлэри, саҥа этэрээти тэрийэллэрин, ыччаты кытта  күүстээх сибээстээхтэрин  иһиттибит, сөхтүбүт!

Бу күн тэриллибитэ 45 сылын туолбут “Чэчирбит”  кыргыттара: хамандыырдар Новелла Потапова, Катя Федорова, хамыһаар Вера Гоголева, бастыҥ актыбыыстар Августина Хабарова, Люда Баишева, Люба Яковлева, Аня Попова, Аля Иванова, Мария Иванова сүлүөккэ “Чэчир” аатын чиэстээхтик көмүскээтилэр.

Сүлүөккэ сандалы хотойорунан ас бөҕөтүн тардынныбыт, тото аһаан күүс-сэниэ  ылынныбыт. Саха таҥастарын, симэҕин бастыҥын “Чэчир” кыргыттарыгар көрдүбүт.  Сахалыы чороонноох  эҕэрдэ  үҥкүүтүн Анна Попова,  Любовь Яковлева олус истиҥник толордулар.

Хаҥалас Тиит Арыытын бастыҥ учуутала, кийиитэ, хамандыырбыт Новелла Потапова-Петрова быйыл бэйэтинэн иилээн-саҕалаан агитбиригээдэбит урукку этэрээт сылларын санатта.

Сайылык сахалыы сценкатыгар биригэдьиир оруолун Вера Бочкарева, сайылык  саамай бастын үүттээх ынаҕын үрдүк чыпчааллары дабайар норуот маастара Катя Федорова олус күүстээхтик, Аля Иванова, Мария Иванова  эдэр устудьуонкалары итэҕэтиилээхтик толордулар.

Түһүлгэбитин саламанан, сахалыы олбоҕунан дьэргэччи Мэҥэ Хаҥаластан суруйааччы кыыспыт Гутя Хабарова  киэргэттэ.  Этэрээт хаһыатын эрэдээктэр Люда Баишева, худуоһунньук Гутя Хабарова, сэкирэтээр Новелла Потапова таһаардылар.

Пионерия 99 сылынан   уопсай түһүлгэҕэ этэрээппит горн, барабаан  тыаһатан, ардах ортотугар ыксалынан буола турар тэрээһини, бэтэрээннэри, ыччаты соһуччу сэргэхситтэ. Элбэх махтал тылларын иһиттибит, суруйан да ыыттылар.

Вера Бочкарева алгыс этэн, түөрэх түһэрэн, оһуохайын оройуттан тута сылдьар. “Ферма кыргыттара” ырыаны баяннаах уолаттар иилэ хабан сарсыардаттан ол ырыанан ураһабыт иһигэр үҥкүүлээтибит, вальстаан  ыллыбыт. Сэргэлээх ыччата билигин да үөрэҕи, үлэни, ырыаны-тойугу оройуттан тутар, эдэрдии эрчимин ыһыктыбат көлүөнэ буоларыттан олус киэн тутуннум! Бары былыргылыы хомсомуол ырыаларын биир сомоҕо буолан ыллаатыбыт. Ким эрэ суорҕан саҕа плюшевай кыһыл былаах сүгэн кэлбититтэн бары да  соһуйдубут, үөрдүбүт! Олус үчүгэй бастакы сүлүөт буолан ааста. Ил Түмэн норуодунай дьокутаата Александр Жирков, “Биир ньыгыл Арассыыйа” баартыйа Саха сиринээҕи салаатын эрэгийиэннээҕи ситэриилээх кэмитиэтин салайааччыта Руслан Платонов кэлэн кыттыылара сүргэбитин көтөхтө. Эдэр устудьуон оҕолор кыахтара тиийэринэн сүлүөтү тэрийдилэр.

Людмила Баишева, “Чэчир” этэрээт бэтэрээн байыаһа.