19 киһини 5,4 мөлүйүөн солкуобайга албыннаабыт сымыйа маастар тутулунна

Саха Өрөспүүбүлүкэтин ИДьМ Холуобунай ирдэбил управлениетын оперативниктара түөкүннээһининэн дьарыктанар Сунтаар улууһуттан төрүттээх 31 саастаах киһини туттулар.

Полиция үлэһиттэрин дааннайынан, эр киһи интэриниэккэ араас саайтары көрөн, дьиэлэригэр өрөмүөҥҥэ наадыйар дьону көрдүүр эбит. Оннук дьону кытта сибээстэһэн, тутуу эйгэтигэр исписэлииспин диэн бэйэтин билиһиннэрэн, өҥөтүн этинэр, үлэтин кээмэйин кэпсэтэр уонна эрдэттэн төлөбүр ыыталларыгар итэҕэтэр эбит.

Үксүгэр харчыны ылаат, албынньыт килийиэннэрин кытта сибээскэ тахсыбат буолан хаалар эбит. Сороҕор сакаасчыттарын албынныырыгар үлэһиттэр биригээдэлэрин сакаастаан, өрөмүөн бүтээтин кытта төлүөм диэн эрэннэрэр. Ол эрээри дьиэ хаһаайыттарыттан харчы ылаат, түөкүн сүтэн хаалар эбит.

Бу курдук 2024 сылтан сымыйа маастар 19 киһини албыннаан, уопсайа 5,4 мөл. солкуобайы уорбут. Холобур, Дьокуускай куорат биир олохтооҕо кинини кытта кыбартыыратын өрөмүөннүүргэ кэпсэтэн, 892 тыһыынча кэриҥэ солкуобайы биэрбит. Ол кэннэ эр киһи солото суоҕунан, атын төрүөтү толкуйдаан сылтахтана-сылтахтана, кэлин сибээстэспэт буолбут.

Уоруллубут харчыны бэйэтин көрүүтүнэн туттубут.

Полиция үлэһиттэрэ буруйу оҥорооччуну туттулар. Кини РФ Холуобунай кодексатын 159-с ыстатыйатынан (Түөкүннээһин) көрүллэр буруй бэлиэлэринэн, РФ ИДьМ «Дьокуускай» куораттааҕы управлениетын силиэстийэлиир чааһын силиэдэбэтэлэ көбүппүт элбэх дьайыылаах холуобунай дьыалатыгар буруйданааччынан барда.

Силиэстийэ кэмигэр киниэхэ хааччахтыыр миэрэ быһыытынан ханна да барбат туһунан илии баттааһын талылынна. Эр киһи сокуону кэһэр дьайыыларын силиэстийэлээһин салҕанар диэн Саха сиринээҕи ИДьМ иһитиннэрэр.