«Мин Сахам сирэ — XXI үйэҕэ» хамсааһын чэрчитинэн үс эбийиэк үлэҕэ киирдэ

2026 сылтан саҕалаан өрөспүүбүлүкэҕэ «Мин Сахам сирэ XXI үйэҕэ» хамсааһын чэрчитинэн үс эбийиэк үлэҕэ киирбит.

Ол курдук,  Заречнай бөһүөлэккэ 60 миэстэлээх оскуола, Өлүөхүмэ улууһун Даппарай сэлиэнньэтигэр култуурунай-спортивнай комплекс, Кэбээйи улууһун Батамай сэлиэнньэтигэр элбэх хайысхалаах киин. Бу туһунан Саха сирин тутууга министиэристибэтэ иһитиннэрдэ.

Култуура тэрилтэлэрин сайыннарыы уонна саҥардыы дойду бэрэсидьиэнэ Владимир Путин көҕүлээбит «Дьиэ кэргэн» национальнай бырайыак соруктарыгар сөп түбэһэр. Бу бырайыак дьиэ кэргэттэр олохторун хаачыстыбатын тупсарарга уонна тыа сиригэр култуура өҥөтүн тиксимтиэ оҥорорго туһуланар. «XXI үйэҕэ мин Сахам сирэ» хамсааһын чэрчитинэн киирбит эбийиэктэр — өрөспүүбүлүкэҕэ тыа сирин сайыннарыыга ыытар бэлиитикэбит», — диэн эрэгийиэн тутууга миниистирэ Виктор Романов бэлиэтээтэ. Министиэристибэҕэ эппиттэринэн, бу хамсааһын олохтоох нэһилиэнньэлээх пууннарга наадалаах социальнай эбийиэктэри тутарга көмөлөһөр. Сыала — өрөспүүбүлүкэ, муниципалитеттар, тэрилтэлэр уонна олохтоохтор кыахтарын холбоон, сэлиэнньэлэри сайыннарыыга уонна олох усулуобуйатын тупсарыыга туһаайыы. Дьон-сэргэ маннык бырайыактарга кыттан, оҕолорун үөрэтэллэригэр, успуордунан, айар дьоҕурунан дьарыктаналларыгар, тэрээһиннэри ыыталларыгар бэйэлэрин дьиэлэрин таһыгар саҥа кыахтары ылаллар. Олохтоохтор кыттыылара миэстэтигэр баар наадыйыыны учуоттуурга уонна төрөөбүт дойдуларын сайыннарыы тула сомоҕолоһорго көмөлөһөр.

Батамай сэлиэнньэтигэр 396 кв. м иэннээх элбэх хайысхалаах киин тутуллубута. Бу дьиэҕэ култуура дьиэтэ (көрөөччү саалалаах), бибилэтиэкэ уонна нэһилиэк дьаһалтата үлэлииллэр. Киини тутуу 2022 сылтан саҕаламмыта. Эбийиэк «XXI үйэҕэ мин Сахам сирэ» хамсааһын уонна «Тыа сирин сайыннарыы» судаарыстыбаннай бырагыраама чэрчитинэн тутуллубута.

Ааспыт биэс сыл иһигэр Саха сиригэр 36 култуурунай сынньанар киин тутуллубут, 17 оҕо ускуустубатын оскуолата өрөмүөннэммит.

«XXI үйэҕэ мин Сахам сирэ» хамсааһын 1999 сылтан Мэҥэ Хаҥалас улууһун олохтоохторун уонна дьаһалтатын көҕүлээһининэн үлэтин саҕалаабыта. Бырайыагы Саха сирин Бастакы Бэрэсидьиэнэ Михаил Николаев өйөөбүтэ. Бу сыллар тухары бырагыраама чэрчитинэн 1200-тэн тахса социальнай суолталаах эбийиэк тутуллубут: оскуолалар, оҕо уһуйааннара, култуура дьиэлэрэ, элбэх хайысхалаах кииннэр, успуорт саалалара, эдэр исписэлиистэргэ аналлаах элбэх кыбартыыралаах дьиэлэр.

Сиһилии билсэр сигэ: https://www.sakha.gov.ru/news/67859