Кыра да көмө улахан көдьүүстээх

Геннадий, Давыд Ивановтар «Надежда» иис сыаҕар муус тиэйэн аҕаллылар.

Ини-биилэр элбэх оҕолоох ыал уолаттара буолаллар. Төрөппүттэрэ Мария Давыдовна, Геннадий Васильевич 80-саастарыгар чугаһаабыт кырдьаҕастар. Бырааттара 2022 сыллаахха мобилизацияҕа ыҥырыллан байыаннай дьайыыга сылдьар. Ивановтар айылҕалыын алтыһан, сир аһын быйаҥыттан тииһинэн, бултаан-балыктаан олорор сахалыы иитиилээх сэмэй ыаллар.

Ини-биилэр бу сыллар тухары үтүө санаанан салайтаран, нэһилиэктэрин иһигэр волонтердууллар. Ол курдук, байыаннай дьайыыга сылдьар уолаттарга ыраастаналларыгар наада диэн иннэлээх мас лабааларын тыаттан аҕалалларыгар көрдөспүппүтүн тута аҕалбыттара, ону Дьокуускайга «Илии сылааһа» иистэнэр сыахха ыыппыппыт. Ону тутаннар, салайааччы Саввина И.Е. уолаттарга махталын биллэрбитэ.

Оттон бүгүн Геннадийдаах Давыд байыастарга таҥас тигэр «Надежда» иис сыаҕар муус тиэйэн аҕаллылар. Иһэр уунан  хааччыйбыттарын иһин уолаттарбытыгар истиҥник махтанабыт. Уйан сүрэххит, амарах дууһаҕыт дьон махталынан туоллун. Доруобай, эйэлээх, дьоллоох буолуҥ!

Ираида Софронеева, «Надежда» иистэнэр сыах сырдатааччыта.

Куокуй нэһилиэгэ, Кэбээйи.