Элгээйи Ээдьигэ чөмпүйүөн суоппар

Эдуард Константинович Исаев Сунтаарга бэс ыйын 21 күнүгэр 1946 сыллаахха 11 оҕолоох ыалга төрөөбүтэ. Ийэтэ Анастасия Николаевна Исаева, айбыт аҕата Константин Петрович Уаров, ииппит аҕата Василий Терентьевич Саввинов.

Суоппар идэтигэр бастакы олугу уурбут киһинэн  ииппит аҕата буолар. Эдик Сунтаар 1 нүөмэрдээх оскуолатын бүтэрэн Автошколаҕа Владимир Крыжановскайы кытта үөрэммитим, кинини «Болдьумаар» диэн ааттыыр этим диэн киэн тутта кэпсиир. Эдэр киһи үөрэҕин бүтэрэн «Сельхозтехника» тэрилтэҕэ бульдозериһынан үлэлээбитэ, ол курдук Куокуну Табаҕатыгар, Тойбохой Арыылааҕар, Маар Күөл Боруулааҕар, Андылааҕар, Кириэстээххэ араас үлэни кыайа туппута. 1965 сыллаахха аармыйаҕа ыҥырыллан, үс сыл устата сулууспалаан кэлэн,  Хасан Пшинцев диэн ааттаах салайааччы сүбэтинэн суоппар кууруһугар үөрэммитэ. 1969 сыллаахха Сунтаарга МТС тэрилтэҕэ бульдозерынан ойууру солооһуҥҥа, дулҕа анньыыга үлэлээбитэ, онтон Элгээйигэ көһөн кэлэн  суоппардаабыта. Манна уу таһар  массыынаҕа   үлэлээбитэ. Бу үлэлии сылдьан 1970-1971 сыллаахха бастакытын республикаҕа чөмпүйүөн суоппар үрдүк аатын ылбыта. Кини уопсайа Саха сиригэр түөртэ чөмпүйүөннээбитэ, бу улахан суолталаах түгэн.  Пятилетка бастыҥ үлэһитинэн ааттаммыта. Санаан көрүҥ, кини кэнниттэн республика көрдөрүүтүнэн иккис сылдьар киһи 7 хотону уунан хааччыйар буоллаҕына, кини 28 хотоҥҥо уу таһара. Бу үлэбэр баартыйата суох буолан чөмпүйүөн лиэнтэтин биэрбэтэх кытта түгэннээхтэр диэн үлэһит киһи баартыйаҕа хом саныыр түгэнэ эмиэ баар. Ол эрээри бу ааты-суолу ыларыгар партком Петр Яковлевич Федоров, отделение управляющайа Егор Гаврильевич Иванов улаханнык өйөөбүттэрин күндүтүк саныыр.

1969-1973 сыллаахха Ленин уордьаннаах Элгээйи совхоһугар, 1973-1977 сыллаахха «Сельхозтехника» тэрилтэлэргэ суоппардаабыта, бульдозеристаабыта, краҥҥа  үлэлээбитэ. Онтон Элгээйи совхозка төттөрү кэлэн ЗИЛ, КамАЗ массыынаҕа сылдьыбыта, манна киниэхэ сүбэ-соргу биэрээччитэ, күүс-көмө буолааччыта сэрии бэтэрээнэ Петр Васильевич Захаров  этэ. Бу манна үлэлии сылдьан бастакы КамАЗ-тары Набережнай Челныттан перегоннаабыта. Совхоз эстибитин кэннэ баһылык Александр Миронов баһаарынай чаас тэрийэн биир сыл начальниктаабыта, ол кэннэ Алексей Иванов ыҥырыытынан Элгээйи сельпотугар механигынан, водовозка, краҥҥа суоппарынан 16,5 сыл үлэлээбитэ. Бу тэрилтэттэн бочуоттаах сынньалаҥҥа баран Виктор Николаевтыын бастакы таксистарынан буолбуттара. Сынньалаҥҥа олорон Прокопий Акимов тэрилтэтигэр суоппарынан, харабынайынан үлэлээбитэ, кэлин таас оскуолаҕа харабынайдаабыта, уматык кутааччынан үлэлээбитэ.

Эдуард Константинович  буоксаҕа бастакытынан  холонооччулартан биирдэстэрэ, 1961 сыллаахха республикаҕа биэс төгүл 2,3 үрдэллэри ситиспитэ.

Эдуард элбэх оҕолоох, сиэннэрдээх, хос сиэннэрдээх. Бастакы кэргэнэ Лидия Ивановналыын  биэс оҕолоохтор, иккис кэргэнэ Лидия Николаевнаттан түөрт оҕолоохтор. Ыччаттарыттан ааттаах тутааччы, хирург, суоппар уо. д. а. бааллар.

Кини Элгээйи бочуоттаах олохтооҕо, СӨ бочуоттаах бэтэрээнэ,  СӨ тыатын хаһаайыстыбатын бочуоттаах үлэһитэ, Сунтаар нэһилиэгин үрүҥ көмүс бэлиэтин, Ил Түмэн кыһыл көмүс чаһытын хаһаайыннара.

Дьэ, ити курдук Элгээйи ИСАЕВ ЭДУАРДА суоппарынан эҥкилэ суох үлэлээн республикаҕа  түөртэ чөмпүйүөннээбит туруу суоппар. Кини быйыл 80 сааһа, истиҥ эҕэрдэ!

Тускулаана ГОРОХОВА-КОБЕЛЬЯНОВА