«Арктикатааҕы эргиэн-логистика» хампаанньата навигацияны түмүктээтэ

«Арктикатааҕы эргиэн-логистика» хампаанньата Арктика уонна хотугу улуустарга социальнай суолталаах аһы-үөлү тиэрдии былаанын 106,6% толордо. Былааннаммыт 1 500 туонна оннугар 1 600 туонна таһаҕас тиэрдилиннэ диэн  СӨ Арктиканы сайыннарыыга уонна Хоту норуоттар дьыалаларыгар министиэристибэтэ иһитиннэрэр.

Уопсай тиэрдиллибит таһаҕастан 1 236 туонната — социальнай суолталаах  бородуукта (бурдук, саахар, мокоруон, туус, арыы уо.д.а.), оттон 364 туонната  сибиэһэй оҕуруот аһа уо.д.а. буолар. Арктика уустук суолун-ииһин  учуоттаан, таһаҕаһы тиэйиигэ тырааныспар бары көрүҥэ туһанылынна.

Уу суолунан тиэрдии

• Халыма бөлөх улуустарыгар 400 туонна тиэрдилиннэ.
• Индигиир өрүһүнэн Аллайыаха уонна Абый улуустарыгар — 227 туонна аһылык.
• Дьааҥы өрүһүнэн Усуйаанаҕа — 153 туонна. Маныаха Усуйаана улууһун сүрүн наадыйыыта (607,7 туонна социальнай суолталаах аһылык) кыһыҥҥы суолунан толоруллубута, оттон навигация кэмигэр Уус Куйга олохтоохторугар эбии 11 туонна оҕуруот аһын иккитэ салгын тыраныыспарынан  тиэрдилиннэ.
• Булуҥ улууһугар 278,47 туонна, Эдьигээҥҥэ 112,5 туонна таһаҕас уу суолунан.

Арктика 13 улууһуттан аҕыһыгар эрэ таһаҕас уу суолунан тиэрдиллэр буолан, атыттарыгар атын логистика  туһанылынна.

Ол курдук, Анаабыр, Дьааҥы, Эбээн Бытантай уонна Муома улуустарыгар 40 туонна аһылык көтөр аалынан тиэрдилиннэ. Оттон суола-ииһэ олус уустук Өлөөн улууһугар 14 туонна социальнай суолталаах бородуукта вездеходунан тиэрдилиннэ.