Боотулуу нэһилиэгэр саахалланар туруктаах дьиэ оннугар быраас саҥа амбулаторията үлэҕэ киирдэ

Үөһээ Бүлүү улууһун Боотулуу сэлиэнньэтигэр быраас саҥа амбулаторията үлэтин саҕалаата. Саҥа дьиэ 1959 сыллаахха тутуллубут саахалланар туруктаах дьиэ оннугар тутулунна. Билигин олохтоохтор аныгы, сылаас уонна тупсаҕай оҥоһуулаах дьиэҕэ көрдөрүнэр, эмтэнэр кыахтаннылар.

Эбийиэк дойду Бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыак иһинэн киирэр доруобуйа харыстабылын бастакы сүһүөҕүн саҥардыы федеральнай бырагырааматын чэрчитинэн тутулунна. Мэдиссиинэ саҥа эбийиэгин тутууга федеральнай бүддьүөттэн 19,2 мөл. солк. ордук үп көрүлүннэ.

Боотулуутааҕы амбулатория акушерката Лариса Уйгурова нэһилиэк олохтоохторо өр кэтэспит эбийиэктэрэ үлэҕэ киирбититтэн олус махтаналларын бэлиэтээтэ.

«Саҥа амбулатория аһыллыыта – Боотулуу нэһилиэгин олохтоохторугар улахан суолталаах тэрээһин. Аныгы уонна табыгастаах усулуобуйа нэһилиэнньэҕэ бастакы мэдиссиинискэй-санитарнай көмөнү хаачыстыбалаахтык оҥорорго эбии кыаҕы биэрэр. Бу мэдиссиинэ исписэлиистэрин үлэлэрин усулуобуйатын тупсарыыга эмиэ улахан хардыынан буолар. Өрөспүүбүлүкэ салалтатыгар, Доруобуйа харыстабылын министиэристибэтигэр уонна бу бырайыагы олоххо киллэриигэ кыттыбыт дьоҥҥо барыларыгар махтанабын. Саҥа амбулатория мэдиссиинэ көмөтүн үрдэтэргэ уонна нэһилиэк олохтоохторун доруобуйатын бөҕөргөтөргө төһүү буоларыгар эрэнэбин», — диэн Үөһээ Бүлүүтээҕи киин балыыһа кылаабынай бырааһа Сардана Павлова эттэ.

Амбулатория үөрүүлээх аһыллыытын сиэрэ-туома алтынньы 22 күнүгэр Ил Дархан Айсен Николаев кыттыылаах видео-конференция сибээһинэн ыытылынна. Бу күн өссө өрөспүүбүлүкэ түөрт нэһилиэнньэлээх пуунугар саҥа амбулаториялар үлэлэрин саҕалаатылар.

Санатан аастахха, 2018 сылтан Саха сиригэр 130-тан тахса доруобуйа харыстабылын эбийиэгэ үлэҕэ киирдэ. Киэҥ далааһыннаах саҥардыы бүтүн өрөспүүбүлүкэни хабар: онкологическай уонна кардиологическай диспансердар курдук улахан анал кииннэртэн саҕалаан, саамай ыраах нэһилиэктэргэ баар биэлсэр-акушер пууннарыгар тиийэ.

2026 сыл саҕаланыаҕыттан Саха сиригэр доруобуйа харыстабылын 10 эбийиэгэ үлэҕэ киирдэ. Ол эбийиэктэр бары Бэрэсидьиэн Владимир Путин көҕүлээбит «Уһун уонна көхтөөх олох» национальнай бырайыак иитинэн тулуннулар. Саҥа дьиэлэр тутуллан, өрөспүүбүлүкэ олохтоохторугар мэдиссиинэ көмөтүн оҥорорго уонна исписэлиистэр үлэлииллэригэр табыгастаах усулуобуйа тэрилиннэ. Бу туһунан Ил Дархан уонна Бырабыыталыстыба пресс-сулууспата суруйар.