2025-2026 сылларга 800-тэн тахса хат дьахтары глюкозаны кэтээн көрөр систиэмэнэн хааччыйбыттар

2025-2026 сылларга «Сахарнай диабеты кытта охсуһуу» федеральнай бырайыак чэрчитинэн глюкозаны тиһигин быспакка кэтээн көрөр систиэмэнэн Саха сиригэр 803 хат дьахтар хааччыллыбыт.

Өрөспүүбүлүкэҕэ бу үлэ Арассыыйа Бэрэсидьиэнэ Владимир Путин саҕалаабыт «Уһун уонна көхтөөх олох» национальнай бырайыак сыалын уонна соругун толорууга туһаайыллар.

Сайаана Оконешникова  глюкозаны кэтээн көрөр систиэмэни ылбыта. Кини бу туһунан:

«Бу мин бастакы оҕом. Онон, биллэн турар, оҕом да, бэйэм даҕаны этэҥҥэ буоларбытыгар долгуйабын. Кэтээн көрөр систиэмэни босхо ылыахха сөбүн истэн баран олус үөрбүтүм. Билигин мин глюкозам таһымын кэтээн көрөр кыахтаах буолан санаам чэпчээтэ уонна доруобуйабар ордук болҕомтолоохтук сыһыаннаһар буоллум. Маннык суолталаах кэмҥэ кыһамньылаахтарыттан уонна наадалаах көмөнү ыларбыттан үөрэбин».

1-кы уонна 2-с тииптээх, гестационнай уонна моногеннай сахарнай диабеттаах ийэ буолар дьахталлар глюкозаны тиһигин быспакка кэтээн көрөр портативнай систиэмэни (ГБК) босхо ылыахтарын сөп.

Бу систиэмэ глюкоза таһымын кэтээн көрөр уонна кини уларыйыыларын туһунан иһитиннэриини ыларга кыах биэрэр. Бу дьахталлар уонна мэдиссиинэ үлэһиттэрэ оҕо күүтэр кэмҥэ доруобуйа туругун хонтуруоллуулларыгар көмөлөһөр.

Татьяна Павлова, СӨ доруобуйатын харыстабылын миниистирин солбуйааччы:

«Хонтуруолга наадыйар дьахталлар бу тэрили босхо ылан, быраас сүбэтинэн оҕо күүтэр кэмнэригэр туһанар кыахтаах буолбуттара биһиэхэ суолталаах. Сахарнай диабеттаах ыарыһахтары наадалаах хонтуруоллуур сириэстибэлэринэн хааччыйыы үлэтин салгыы ыытабыт».

Ил Дархан уонна Бырабыыталыстыба пресс-сулууспата.