2026 сылга Саха сиригэр ТОР резиденнэрэ 23 миллиард солкуобайтан тахсаны инвестициялаатылар

2026 сылга Уһук Илин уонна Арктика сайдыытын корпорациятын (КРДВ) кытта түһэрсиллибит сөбүлэһиилэр чэрчилэринэн, Уһук Илин уонна Арктика эрэгийиэннэрин урутаан сайдар сирдэр (ТОР) уонна Арассыыйа Федерациятын Арктическай зонатын (АЗРФ) резиденнэрэ Саха сиригэр инвестиционнай бырайыактары олоххо киллэриигэ 23,8 миллиард солкуобайы уктулар.

«Судаарыстыба өйөбүлүн дьаһаллара Уһук Илиҥҥэ эбии инвестициялары тардарга кыаҕы биэрэллэр. Бу инструменнар көмөлөрүнэн  урутаан сайдар сирдэр, ол иһигэр  Владивосток көҥүл пордунан, Арассыыйа Федерациятын Арктическай зонатын эрэсииминэн  үлэлии турар тэрилтэлэр саҥардыллаллар уонна саҥа тэрилтэлэр тутуллаллар,  үлэ миэстэлэрэ тэриллэллэр», – диэтэ РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин УИФУо-ка боломуочуйалаах бэрэстэбиитэлэ Юрий Трутнев.

Үп сүрүн өлүүтэ бырамыысыланнаска уонна инфраструктура бырайыактарыгар тиксэр. Инвестиция кээмэйинэн лиидэринэн хайа бырамыысыланнаһа уонна металлургия буолла. Инвестиция өттүнэн саамай актыыбынай салаалар ахсааннарыгар ону сэргэ энэргиэтикэ, логистика уонна тырааныспар киирэллэр. 2026 сылга биэс бөдөҥ салаа резиденнэр ууруммут үптэрин 95% хааччыйда.

 «Саха сирэ» ТОР эрэсиимин чэпчэтиилэринэн туһанар бырайыактарынан «Саюри» сыл устата үлэлиир тэпилииссэ комплексы, Уһук Илиҥҥэ бастакы «Үлэ кыбаартала» креативнай кластеры, саҥардыллыбыт Жатайдааҕы суудуна верфэтин, Аллараа Бэстээх бөһүөлэгэр таһаҕас терминалын бэлиэтиэххэ сөп. «Соҕуруу Саха сирэ» ТОР эрэсиимин өйөбүлүнэн коксаланар чоҕу хостуур уонна үрдүк хаачыстыбалаах чох концентратын оҥорон таһаарар хайа-байытар комплекстары тэрийиигэ бөдөҥ инвестиционнай хайа-геологическай бырайыактар олоххо киирэллэр. Бу — «Инаглинскай» уонна «Денисовскай» ГОК-тар.