2027-2029 сылларга федеральнай бүддьүөт барылын маҥнайгы ааҕыыга ылыннылар

«Биир ньыгыл Арассыыйа» фракция бүддьүөт сокуонун барылын биир санаанан өйөөтө диэн Судаарыстыбаннай Дуума дьокутаата Галина Данчикова иһитиннэрэр.

Бүддьүөт уонна нолуок кэмитиэтэ бүддьүөт бакыатын оҥорууга сүҥкэн үлэни ыытта. Судаарыстыбаннай бырагыраамалар бары ымпыктаан-чымпыктаан ырытылыннылар, Судаарыстыбаннай Дуума 32 тустаах кэмитиэтин, Ааҕар-суоттуур балаата, Киин баан, Арассыыйа Уопсастыбаннай балаататын, Арассыыйа ТПП-тын уонна бары эрэгийиэннэр түмүктэрэ ылылынна.

Сүрүнэ диэн, чугастааҕы үс сылга бүддьүөт барыла дойду Бэрэсидьиэнэ Владимир Путин туруорбут суолталаах соруктарын хааччыйыа. Ол курдук Оборуона уонна куттал суох буолуутун наадыйыытын, ол иһигэр байыаннай сулууспалаахтары, анал байыаннай дьайыы кыттыылаахтарын, бэтэрээннэри уонна кинилэр дьиэ кэргэттэрин көмүскээһини, толору хааччыйыы, судаарыстыба гражданнар иннилэригэр социальнай эбэһээтэлистибэлэрин халбаҥнаабакка толоруута, экэниэмикэ туруктаахтык сайдыыта, бастатан туран, технологическай суверенитекка тиийии киирэллэр. Докуомуон оҥоһулларыгар дохуот уонна ороскуот тэҥнэһиитэ тутуһулунна, дьиҥнээх экэниэмикэ хайысхалара учуоттаннылар, бөҕө туруктаах буолууга саппаас оҥоһулунна.

Бүддьүөт барылыгар баартыйа Норуотун бырагырааматын үөрэх систиэмэтин сайыннарыыга, оскуолалары уонна оҕо уһуйааннарын тутууга уонна хаппытаалынай өрөмүөҥҥэ балаһыанньалара учуоттаннылар. Доруобуйа харыстабылыгар, эмтэринэн хааччыйыыга уонна бастакы сүһүөх звенону модернизациялааһыҥҥа улахан үп угуллар. Биэнсийэлэри уонна босуобуйалары индексациялыырга, хамнас алын кээмэйин үрдэтэргэ уонна оҕолоох дьиэ кэргэттэри өйүүргэ, ол иһигэр биир кэлим босуобуйаны үбүлээһиҥҥэ уонна ийэ хапытаалын индексациялыырга үп көрүлүннэ.

«Биир ньыгыл Арассыыйаҕа» бүддьүөт саамай суолталаах киритиэрийдэринэн – социальнай хайысхалааҕа, дойду сайдыытын сыалларыгар сөп түбэһиитэ уонна Норуот бырагырааматын үбүлээһин буолар», — диэн баартыйа Генсэбиэтин сэкирэтээрэ Владимир Якушев эттэ.

«Бүддьүөт – бу биһиги эһигини кытта дойдуга дьон олоҕо тупсарын, дойду сайдарын туһугар туруорар сыалларбыт. Ону Бэрэсидьиэн биһигиттэн ирдиир, ол иһигэр «Биир ньыгыл Арассыыйа» баартыйа итинник сүрүн соругу туруорар», — диэн Бүддьүөт уонна нолуок кэмитиэтин бэрэссэдээтэлэ Андрей Макаров бэлиэтээтэ.

Сыаллары ситиһиигэ уонна национальнай бырайыактары – туруоруллубут соруктары быһаарыы сүрүн үнүстүрүмүөннэри олоххо киллэриигэ 19 триллионтан тахса солкуобай көрүлүннэ.

Дойду сүрүн үбүн докумуонун маҥнайгы ааҕыыга ылыынан Судаарыстыбаннай Дуумаҕа уураах ылылынна. Онно иккис ааҕыыга диэри быһаарыллыахтаах боппуроустар киирдилэр.