Саха сиригэр «Куттала суох Арктика — 2027»  тэрээһиҥҥэ бэлэмнэниини дьүүллэстилэр

Саха сиригэр «Куттала суох Арктика — 2027» ыксаллаах быһыыга-майгыга үөрэтэр эрчиллиилэргэ бэлэмнэниини дьүүллэстилэр. Мунньахха Саха сирин Бырабыыталыстыбатын Бэрэссэдээтэлин бастакы солбуйааччы Николай Бочков уонна ЫБММ сүбэһитэ Даниил Мартынов кытыннылар. Сүрүн тэрээһиннэр Дьокуускайга 2027 сыл от ыйыгар буолуохтара.

Эрчиллии кэмигэр сүрүн болҕомто Арктикаҕа быыһыыр үлэни ыытыыга сулууспалар бииргэ дьайыыларыгар ууруллуоҕа.

Кыттааччылар маннык түгэннэргэ бэлэмнэнэр үөрэхтэри ааһыахтара:

• Ууга тахсар быһылааннарга көмөлөһүү;
• Уу аалларыгар баһаары умулларыы;
• Ньиэп тохтуутун содулун туоратыы;
• Саас халаан уутун саҕана дьону эвакуациялааһын;
• Водолазтар үлэлэрэ уонна тепловизордаах дроннары туһанан сүппүт дьону көрдөөһүн;
• Эчэйбит дьону көтөр аалынан таһаарыы.

«Арктикаҕа сулууспалар бэйэлэрин сорудахтарын төһө чуолкайдык өйдүүллэриттэн уонна бииргэ үлэлиир сатабылларыттан элбэх тутулуктаах. Чопчу маннык бииргэ үлэлээһиҥҥэ эрчиллиилэр кэмнэригэр сүрүн болҕомтону ууруохпут», — диэн бэлиэтээтэ Николай Бочков.

Тэрээһин биир сүрүн чааһынан Өлүөнэ өрүһүнэн Дьокуускай — Тиксии — Дьокуускай хайысхалаах 3400 км тахса уһуннаах эспэдииссийэ буолуоҕа. Маннык дьиҥнээх усулуобуйаҕа ыытыллар эрчиллиилэр тиэхиньикэни уонна сэби-сэбиргэли бэрэбиэркэлииргэ кыах биэриэхтэрэ.

Дьыалабыай уонна научнай бырагыраама Арктика сирдэрин куттала суох буолуутугар, ирбэт тоҥҥо турар дьиэлэр бөҕө туруктарыгар уонна саҥа быыһыыр тиэхиньикэни туһаныыга ананыаҕа. Салгыы бэлэмнэнии чэрчитинэн, ЫБММ уонна өрөспүүбүлүкэ улуустарын кытта эспэдииссийэ маршрутун уонна тэрээһиннэр ыытыллар былаһааккаларын чуолкайдыахтара.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.