«Саха сирин балыга» дьаарбаҥкаҕа 10-ча балык хаһаайыстыбата кыттар

Бүгүн, алтынньы 30 күнүгэр, киин куорат Комсомольскай болуоссатыгар «Саха сирин балыга» диэн өрөспүүбүлүкэтээҕи быыстапка-дьаарбаҥка үлэтин саҕалаата, быйыл бу тэрээһин 16-с төгүлүн ыытыллар.

Дьаарбаҥкаҕа Арктика улуустарыттан 10-ча тыа хаһаайыстыбатын кэпэрэтииптэрэ уонна общиналара, ону тэҥэ Булуҥ, Усуйаана, Абый, Эдьигээн, Аллараа Халыма, Кэбээйи уонна Мииринэй улуустарын балык хаһаайыстыбаларын урбаанньыттара кытталлар. Быйыл аан бастаан дьаарбаҥкаҕа Мииринэй оройуонун Чернышевскайдааҕы балык иитэр собуотугар үөскэтиллибит форель атыыга таҕыста. Ону таһынан олохтоох тыа хаһаайыстыбатын оҥорон таһаарааччыларын эт уонна үүт аһылыктара атыыланар.

Тэрээһин аһыллыытыгар СӨ тыатын хаһаайыстыбатын миниистирин солбуйааччы Айаал Тимофеев эҕэрдэ тылыгар хотугу улуустартан балыгы аҕалыы – өрөспүүбүлүкэҕэ аһылык бородууксуйатын куттала суох буолуутун хааччыйыыга сүрүн сорук буоларын бэлиэтээтэ.

Санатар буоллахха, быйыл навигация кэмигэр Дьокуускайга 500-тэн тахса туонна бултанар балык аҕалыллыбыт. Сайыҥҥы балык сезонугар уопсайа 1906 туонна балык бултаммыт – бу былырыыҥҥытааҕар 69% элбэх.

«Дьаарбаҥкаҕа 10-ча балык хаһаайыстыбата кыттар. Дьаарбаҥкаҕа көрдөрүллүбүт балык уопсай кээмэйэ – 20-ча туонна. Мин  киин куорат олохтоохторун уонна ыалдьыттарын бу кыаҕы туһанан, балык бородууксуйатын хаһааналларыгар ыҥырабын», — диэтэ Айаал Тимофеев.

Дьаарбаҥка үс күн устата – алтынньы 30 күнүттэн сэтинньи 1 күнүгэр диэри, күн аайы 10:00 чаастан 17:00 чааска диэри үлэлиэҕэ. Бу өрөспүүбүлүкэ экэниэмикэтигэр, аһылык бородууксуйатын куттала суох буолуутун хааччыйыыга уонна Хотугу норуоттар төрүт олохторун укулаатын харыстааһыҥҥа балык салаатын киллэрэр кылаатын бэлиэтиир сүрүн тэрээһин.