2027 сылга Нерюнгритааҕы балыыһаны саҥардыыга эбии 350 мөл. солк. диэри үп-харчы көрүллүөҕэ

Арассыыйа Федерациятын Бырабыыталыстыбатын Бэрэссэдээтэлэ Михаил Мишустин вице-премьердэри кытта суһал мунньахха Нерюнгритааҕы киин улуус балыыһатын саҥардыыга эбии 350 мөл. солкуобайга диэри үбү-харчыны көрөргө сорудахтаата.

Арассыыйа Бырабыыталыстыбатын салайааччыта бэлиэтээбитинэн, Саха сиригэр маастар-былаан чэрчитинэн Нерюнгри балыыһатын саҥардыы үлэтэ салҕанар. «Маныаха федеральнай бүддьүөттэн номнуо 3 млрд солкуобай тыырылынна. Аныгыскы сылга эбии 350 мөлүйүөҥҥэ диэри үбү көрүөхпүт. Бу туһунан биһиги федеральнай өйөбүлүнэн тутуллубут онкология диспансерыгар сылдьар кэммитигэр, ол иһигэр Михаил Альбертович Мурашконы кытта, кэпсэппиппит. Ону тэҥэ өрөспүүбүлүкэҕэ мэдиссиинэ көмөтүн тиһигэ хайдах тупсан иһэрин уопсайын дьүүллэстибит. Үлэ тэтимэ үчүгэй, биллэн турар, маны салгыы тутуһуохха наада», — диэн Михаил Мишустин эттэ.

Премьер-миниистир Арассыыйа Бырабыыталыстыбатын Бэрэссэдээтэлин солбуйааччытыттан — Арассыыйа Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлэ Юрий Трутневтан бу боппуруостары тус хонтуруолугар ыларыгар көрдөстө. Саха сирин Ил Дархана Айсен Николаев Арассыыйа Бырабыыталыстыбатын Бэрэссэдээтэлэ Михаил Мишустин соторутааҕыта үлэтинэн сырыытын түмүгүнэн манныгы бэлиэтээтэ: Арассыыйа премьер-миниистирэ доруобуйа харыстабылын уонна креативнай экэниэмикэ сүрүн эбийиэктэригэр болҕомтотун уурбута — Саха сиригэр социальнай эйгэни сайыннарыыга, аныгы технологиялары киллэриигэ уонна экэниэмикэ үүнэр-сайдар саҥа туочукаларын тэрийиигэ ыытыллар үлэни үрдүктүк сыаналааһын буолар.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.