2035 сылга диэри Уһук Илиҥҥэ туристическай сырыыны сылга 12 мөлүйүөҥҥэ диэри элбэтэр былааннаахтар

Магадан уобалаһын Завьялов арыытыгар РФ Бырабыыталыстыбатын бэрэссэдээтэлин солбуйааччы — УИФУо бэрэсидьиэн боломуочуйалаах бэрэстэбиитэлэ Юрий Трутнев ыыппыт мунньаҕын биир сүрүн тиэмэтинэн 2035 сылга диэри Уһук Илиҥҥэ туристар сырыыларын ахсаанын сылга 12 мөлүйүөҥҥэ диэри элбэтии буолла.

Дойду бэрэсидьиэнэ Владимир Путин туруорбут сыалын ситиһэргэ туризм инфраструктуратын сайыннарыы, тырааныспар тиийэр суолун тупсарыы, инвестордары өйүүр миэрэлэри кэҥэтии былааннанар.

Юрий Трутнев туризмы сайыннарыыга практическай холобурдар суолталарын бэлиэтээтэ. Биир оннук холобурунан Завьялов арыыта буолар, манна инвестордар административнай өйөбүллээх туризм бырайыагын олоххо киллэрэллэр. Боломуочуйалаах бэрэстэбиитэл эрэгийиэн баһылыктарыгар саҥа кэскиллээх бырайыактар ​​үөскүөхтэрин сөптөөх сирдэригэр болҕомтолорун ууралларын соруйда.

2022 сылтан Уһук Илиҥҥэ турист айанын ахсаана 50% улааппыт. 2025 сыл түмүгүнэн макроэрэгийиэн 7,5 мөлүйүөн туриһы көрүстэ. 2026 сыл бастакы аҥарыгар, турист кэлиитин ахсаана былырыыҥҥы кэми кытта тэҥнээтэххэ 77% үрдээбит.

Салаа сайдыытыгар урутаан сайдар сирдэр, Владивосток көҥүл пуорда уонна Курильскай арыыларга чэпчэтиилээх эрэһиим көмөлөһөллөр. Балары туһанан былааннаммыт инвестицияларын кээмэйэ 314,8 млрд. солкуобайдаах 248 туристическай бырайыак олоххо киирэр. Инвестордар хайыы-үйэ 75,9 млрд солк. укпуттар, 5,8 үлэ миэстэтин таһаарбыттар. 44 бырайыак үлэҕэ киирбит.

Үлэ өссө биир хайысхатынан «Уһук Илин ыллыктара» экологическай уонна туристическай маршруттар ситимнэрин оҥоруу буолар. Уокурук тоҕус эрэгийиэнигэр уопсайа 126,5 килэмиэтир уһуннаах уон аҕыс маршруту сайыннарыы былааннанар. Манна визит-кииннэр, сынньалаҥ зоналара, үөһэттэн көрөр былаһааккалар уонна табыгастаах сылдьар сирдэр баар буолуохтара. Бурятияҕа, Приморьеҕа, Забайкальскай кыраайга сэттэ маршрут хайыы-үйэ аһылынна.

Бүтүн Арассыыйатааҕы «Дальний Восток – страна приключений» диэн дьон бэйэтэ устар видеокиинэлэрин куонкуруһа эмиэ эрэгийиэн туристическай кыаҕын хамсатарга көмөлөһөр. Төрдүс сезоҥҥа дьүүллүүр сүбэ сыанабылыгар 342 үлэ киирбит. Куонкурус тэриллиэҕиттэн Уһук Илиҥҥэ уонна Арктикаҕа айан туһунан икки тыһыынча кэриҥэ видеустуоруйалар хомулуннулар.

Саха Өрөспүүбүлүкэтэ эмиэ бэйэтин туристическай бырайыактарын сайыннарар. Хаҥалас улууһугар «Сиинэ очуостара» экологическай ыллык туристическай инфраструктуратын сайыннарыы бырайыага ыытыллар. Биир килэмиэтир уһуннаах мас тротуар, үөһэттэн көрөр сиргэ тахсыыга тутуһар сирдээх кирилиэс, информационнай истиэндэлээх, хаартыскалаах уонна ыйар бэлиэлээх киирэр сир, ону тэҥэ бэсиэткэлээх, уоту оттор уонна санитарнай эбийиэктээх түөрт кемпинг баар буолуоҕа. Спортивнай тэриллэри уларсар пуун уонна быстах кэмҥэ сувенирдары атыылыыр туочука  былааннаммыттар. Бырайыак 2025-2026 сылларга түмүктэниэхтээх. Экологическай суол оҥоһуллан бүттэҕинэ, сылга 6000 ыалдьыт сылдьара күүтүллэр.

СӨ Ил Дарханын уонна Бырабыыталыстыбатын пресс-сулууспата