240 тыһ. солк. сыаналаах көмүс киэргэллэри уорбут эр киһи тутулунна

ИДьМ сулууспатын «Дьокуускайдааҕы» управлениетын 1 №-дээх полиция салаатын дьуһуурунай чааһыгар олохтоох дьахтар сайабылыанньа суруйбут. Кини дьиэтиттэн уопсайа 240 тыһ. солк. сыаналаах ювелирнай киэргэллэр сүппүттэрин туһунан биллэрбит.

Холуобунай сулууспа оперативниктара көрдүүр үлэлэрин түмүгүнэн уорбаланааччыны булан быһаарбыттар. Буруйдаах сайабылыанньа суруйбут дьахтар уруккута бииргэ олорбут 34 саастаах эр киһитэ буолара биллибит.

Барыллаан быһаарыллыбытынан, дьахтар чугас аймаҕын көмүүтүн тэрийиинэн дьарыктана сылдьыбыт. Ол иһин аймахтара, доҕотторо кутурҕаннарын биллэрэ дьиэтигэр элбэхтик кэлэн-баран ааспыттар. Ыалдьыттар ортолоругар уруккута бииргэ олорбут киһитэ эмиэ баар эбит. Ол эрээри, кини көмөлөһүөн оннугар, дьиэҕэ дьон элбэҕин, аймалҕаннаах кэм буоларын туһанан, өлбүт киһиэхэ тиксэр кыһыл көмүс киэргэллэри (сыап, бөҕөх уонна кириэс) ким да көрбөтүгэр уоран ылбыт.

Уорбаланааччы уорбут малын сороҕун атыылаабыт, оттон ордубутун полиция үлэһиттэрэ тутан ылбыттар.  РФ Холуобунай кодексатын 158-с ыстатыйатын 2-с чааһынан («Уоруу») холуобунай дьыала тэриллибит. Буруйдаах киһи 5 сылга диэри көҥүлэ быһыллыан сөп, диэн Саха сиринээҕи ИДьМ сулууспата суруйар.