4,5 мөл. солк. балыгын уонна «КамАЗ» массыынатын былдьатта

Булуҥ улууһун олохтооҕо сокуону кэһэн, улахан кээмэйдээх балыгын тиэйэн иһэн Чурапчыга тутулунна. Билигин кини балыгыттан да, тырааныспарыттан да матан сууттанна.

Чурапчы улууһун борокуратуурата Булуҥ улууһун Быковскай сэлиэнньэтин олохтооҕор тэриллибит холуобунай дьыалаҕа судаарыстыбаннай буруйдааһынын өйөөтө. Кини РФ Холуобунай кодексатын 171.1 ыстатыйатын 4 чааһын «б» пуунунан (маркировката суох бородууксуйаны улахан кээмэйгэ атыылыыр соруктаах атыылаһыы, харайыы, тиэйии) буруйдааҕынан билиннэ.

Суут быһаарбытынан, 2025 сыл бүтүүтүттэн 2026 сыл кулун тутарыгар диэри, Быковскай сэлиэнньэтин олохтооҕо харчы өлөрөр баҕаттан маркировката суох балыгы атыыласпыт, харайбыт уонна салгыы кимиэхэ баҕарар атыылыыр сыаллаах тиэйбит. Сокуоннайа суох балыгын уопсай сыаната 4 585 095 солкуобайга тэҥнэспит.

Эр киһи  таһаҕаһы «КамАЗ» массыынатынан Быковскайтан Дьокуускай куоратыгар диэри тиэрдэр санаалаах «Халыма» федеральнай суолунан айаннаан истэҕинэ, Чурапчы сэлиэнньэтин чугаһыгар Госавтоинспекция үлэһиттэрэ тохтотон, сокуону кэһэр дьайыытын тохтоппуттар.

«Судаарыстыбаннай буруйдааччы этиитин болҕомтоҕо ылан, суут эр киһиэхэ 300 тыһыынча солкуобай ыстараабы анаата. Ону таһынан, буруйдаах киһи «КамАЗ» массыыната уонна маркировката суох балыга судаарыстыба туһатыгар былдьанна. Суут уурааҕа сокуоннай күүһүгэр киирэ илик», — диэн Саха Өрөспүүбүлүкэтин борокуратуураны пресс-сулууспата иһитиннэрэр.