5 тыһыынчаттан тахса киһи «Мир! Май! ГТО!» успуорт сааскы бэстибээлигэр кытынна

«Мир! Май! ГТО!» успуорт сааскы бэстибээл Дьокуускайга киэҥ далааһыннаахтык буолан ааста.

Чөл олоҕу тутуһууга туһуламмыт тэрээһиҥҥэ  5-тэн 18-гар диэри саастаах кыттааччылар алта түһүмэх нормативын толорон, эт-хаан өттүнэн үрдүк таһымнаах бэлэмнээхтэрин көрдөрдүлэр. СӨ Успуордун министиэристибэтин пресс-сулууспата  иһитиннэриитинэн, Бүтүн Арассыыйатааҕы ГТО физическэй-спортивнай комплекс бэстибээлигэр 5116 киһи кыттыыыны ылла. Билигин маассабай успуорт сайдыытыгар ГТО биир сүрүн бырайыагынан буолар. Комплекс Арассыыйаҕа 2014 сылтан Арассыыйа бэрэсидьиэнэ Владимир Путин көҕүлээһининэн олоххо киирбитэ.  Тэрээһин «Арассыыйа успуордун» федеральнай судаарыстыбаннай бырагырааматын уонна «Биир ньыгыл Арассыыйа» баартыйа «Оҕо спордун» бырайыагын сыалларын-соруктарын толорор соруктаах.

Бэрэсидьиэн Владимир Путин Физическэй култуураны уонна успуорду сайыннарар Сэбиэт мунньаҕар «Кылаабынайа – хаачыстыба, ол дьон доруобуйатынан уонна эт-хаан өттүнэн сайдыытын таһымынан сыаналанар. Төһөнөн элбэх киһи,  ордук оҕолор уонна эдэр дьон ортолоругар успуордунан дьарыктанар да, соччонон сүрэх-тымыр ыарыыларыттан, уойууттан уонна саахар диабетыттан ыалдьар киһи ахсаана аҕыйыыр» диэн бэлиэтээбитэ.

СӨ физическэй култуураҕа уонна успуорка миниистирэ Леонид Спиридонов этэринэн, бэстибээл куорат олохтоохторугар дьиҥнээх спорт бырааһынньыгынан буолла.

Сиһилии: https://prav.sakha.gov.ru/news/52135 сигэнэн аах.