Аармыйаҕа арыгыны утары хонтуруол күүһүрэр

РФ Оборуонатын министиэристибэтэ байыаннай сулууспалаахтары итирик туруктаахтары туоһулуур бэрээдэги дьаһайар Дьиссипилиинэ устаабыгар көннөрүүлэри киллэрэр.

Докумуоҥҥа бэрэбиэркэҕэ туох төрүөт буолара,  хайдах ыытыллара уонна дакаастабыллары хомуйуу быраабылалара чопчуламмыттар. Ону таһынан, арыгыны, наркотигы эбэтэр токсическай эттиктэргэ уорбаланар түгэнигэр, байыаннайдары көрүүгэ хайдах ыытар туһунан ирдэбиллэр киирбиттэр. Сөптөөх докумуон быраап аакталарын официальнай портаалыгар таҕыста.

Сүрүн уларыйыы – Дьиссипилиинэ устаабын 51-с ыстатыйатыгар киирэр көннөрүүлэр. Билигин байыаннай сулууспалаахтары сулууспалыы турар сирдэригэр арыгыга бэрэбиэркэлиир кыах үөскүүр. Бу сулууспа эбээһинэһин толорор кэмҥэ арыгылааһыны утары охсуһууга көдьүүһү үрдэтиэҕэ.

Сокуон барыла манныгы чопчулуур:

• Бэрэбиэркэҕэ төрүөт: Итирик буолуу биллэр бэлиэлэрэ (арыгы сыта, тэмтээкэйдээн хаамыы, саҥата-иҥэтэ булкуллуута, сирэйэ кытарыыта эбэтэр сүөргү быһыы-майгы).
• Ким бэрэбиэркэлиирий: Байыаннай полиция үлэһиттэрэ уонна атын боломуочуйалаах хамандыырдар. Бу түһүмэххэ миэдиктэри кыттыһыннарар наадата суох буолар.
• Тэрээһин хайдах ааһарый: Түмүктэри өйдөөн хаалар  сэртипикээттээх алкотестердар көмөлөрүнэн. Бэрэбиэркэ икки туоһу кыттыылаах эбэтэр видеоҕа уһуллан ыытыллар.

Тыынар салгыҥҥа испиир концентрацията 0,16 мг/л эбэтэр хааҥҥа 0,3 г/л таҕыстаҕына, киһи итирик диэн ааҕыллар. Бары көрдөрүүлэр докумуоҥҥа суруллан киирэллэр. Докумуоҥҥа туоһулар бырааптара, эбээһинэстэрэ уонна видеоҕа устуу быраабылалара эмиэ ыйыллаллар.

Аккаастанар түгэҥҥэ

Алкотестерынан экспресс-бэрэбиэркэ күүһүнэн буолбатах. Өскөтүн байыаннай сулууспалаах аккаастаннаҕына, түмүгү сөбүлээбэтэҕинэ эбэтэр алкотестер көрдөрүүтэ мэлдьэх да буоллаҕына, хамандыыр саарбахтаатаҕына, байыаһы толору туоһулааһыҥҥа ыыталлар. Маннык  мэктиэлэри Доруобуйа харыстабылын министиэристибэтэ быһаарар.

Докумуоҥҥа туспа этиллэринэн, байыаннай тиэхиньикэ, Росгвардия уонна быыһыыр чаастар суоппардарын Байыаннай иниспиэксийэ үлэһиттэрэ суолга куттал суох буолуутун сокуонугар олоҕуран, сүрүн быраабыланан бэрэбиэркэлиэхтэрэ.