Ааспыт сууккаҕа киһи өлүүлээх быһылааннар бэлиэтэннилэр

СӨ Борокуратуурата иһитиннэрбитинэн, ааспыт сууккаҕа киһи доруобуйатыгар эчэйиилээх хас да  түбэлтэ таҕыста.

Ол курдук,  Амма оройуонугар  1995 сыллаах төрүөх эдэр киһи быһаҕынан анньыллан балыыһаҕа киирэн өлбүт. Буруйу оҥорууга уорбаланааччы тутуллубут.  Аны Ленскэй улууһун Витим бөһүөлэгэр быһаҕынан анньыллан   22 саастаах эр киһи балыыһаҕа киллэриллибит. Ньурба Чуукаарыгар эмиэ маныаха маарыҥныыр түбэлтэ тахсыбыт. Киин куоракка 1982  сыллаах төрүөх эр киһи эчэйиини ылан госпитализацияламмыт.

Абый улууһугар күүһүлээһин туһунан сайабылыанньа киирбит.

Өлүөхүмэ улууһун Бэс Күөл сэлиэнньэтигэр 1998 сыллаах төрүөх суоппар итирик туруктаах уруулга олорон,  «Тойота Чайзер» массыынанан  1984 сыллаах төрүөх киһини түҥнэри көппүт. Хомойуох иһин, эмсэҕэлээччи улахан эчэйиини ылан,  миэстэтигэр өлбүт.