Аатырбыт юрист кэс тыла

Бүгүн Саха Өрөспүүбүлүкэтин бочуоттаах гражданина, Арассыыйа Федерациятын үтүөлээх юриһа, юридическай наука дуоктара, бэрэпиэссэр, СӨ Конституционнай суутун бастакы Бэрэссэдээтэлэ, өрөспүүбүлүкэ конституционнай сүбэһитэ Миронов Дмитрий Николаевич 90 сааһыгар анаммыт телемост ыытылынна.

Дмитрий Николаевич В.Ф.Яковлев аатынан Ураллааҕы судаарыстыбаннай юридическай университет устудьуоннарын, Мииринэй оройуонун, Дьокуускай к., Чурапчы улууһун үрдүкү кылааһын үөрэнээччилэрин кытта көрүстэ. Суолталаах тэрээһиҥҥэ Өрөспүүбүлүкэ Конституционнай сэбиэтин бэрэссэдээтэлэ Петр Гоголев,   Ураллааҕы университет үрдүк үөрэх иннинээҕи бэлэмнээһиҥҥэ институтун дириэктэрэ Наталья Новикова кытыннылар.

Бүгүҥҥү телемост көрүҥүнэн устудьуоннар уонна үөрэнээччилэр Дмитрий Миронов олоххо тус көрүүтүн, оччотооҕу олох-дьаһах устуоруйатын, кини хайдах юрист буолбутун уо.д.а. туһунан элбэҕи биллилэр. Өрөспүүбүлүкэ Конституционнай суутун 22 сыл кэриҥэ салайбыт киһиттэн судургута суох кэмнэргэ хайдах сокуон ирдэбилигэр бигэ эрэлин сүтэрбэтэҕин туһунан ыйытыыга Дмитрий Николаевич бу уустук үлэҕэ балаанса баар буолуутун тутуспутун, бары уустук боппуруостарга толкуйдаахтык уонна  сэрэхтээхтик сыһыаннаһан, баар балаһыанньаны сөпкө ырыҥалааһына көмөлөспүтүн бэлиэтээтэ.

Бу уустук идэҕэ уһуйбут үөрэнээччилэриттэн кими чорботон бэлиэтиэҥ этэй диэн ыйытыыга: «Кими эмэ ааттаабакка хааллахпына, соччо бэрдэ суох буолуоҕа”, — диэтэ быһаччы.

Биллэр юрист 1992 сыллаахха Саха Өрөспүүбүлүкэтин Конституционнай суутун бастакы бэрэссэдээтэлинэн буолбута. Бу саҥа судаарыстыбаннай уонна правовой институттар атахтарыгар турар кэмнэрэ этэ. “Биһиги сорукпут оччотооҕу былаас структуратыгар бэйэ миэстэтин булуу этэ. Онно РФ Конституционнай суутун аптарытыата, аата-суола, конституционнай сэбиэти тэрийии эҥин көмөлөспүтэ”, — диэтэ история быыһын сэгэтэн Дмитрий Николаевич.  Чуолаан, 90-с сыллар уратыларын туһунан ыччакка быһаарда. Ол судургута суох кэмнэргэ социальнай кыһалҕалары аччаттарга, балаһыанньаны бигэ туруктаах оҥорорго өрөспүүбүлүкэ Конституционнай суута эмиэ дьоһун оруоллаах буолбут.

Онон бүгүҥҥү көрсүһүүттэн устудьуоннар уонна үөрэнээччилэр үгүһү биллилэр. Бу юрист буолаары сылдьар эдэр дьоҥҥо инники олохторугар үтүө сабыдыаллаах буолуоҕа.