АБДь бэтэрээннэрэ «Идэтинэн бастыҥ» Бүтүн Арассыыйатааҕы куонкурус эрэгийиэннээҕи түһүмэҕэр кытталлар

Бэс ыйын 10 күнүгэр Дьокуускайдааҕы Идэҕэ эрдэтинэ бэлэмниир кииҥҥэ байыаннай дьайыы бэтэрээннэригэр (АБДь) анаммыт «Иккис старт» диэн анал номинацияҕа «Идэтинэн бастыҥ» Бүтүн Арассыыйатааҕы куонкурус эрэгийиэннээҕи түһүмэҕэ саҕаланна.

Куонкурус дойду Бэрэсидьиэнэ Владимир Путин көҕүлээбит «Каадырдар» национальнай бырайыагын чэрчитинэн ыытыллар уонна АБДь бэтэрээннэрэ идэлэригэр бэйэлэрин булуналларыгар, үлэҕэ киирэллэригэр, эйэлээх олоххо үөрэнэллэригэр уонна оробуочай идэлэр суолталарын үрдэтиигэ туһаайыллар.

«“Идэтинэн бастыҥ” куонкурус эрэгийиэннээҕи түһүмэҕин “Иккис старт” номинацияҕа аһыы –  байыаннай дьайыы бэтэрээннэрин өйүүр федеральнай таһымнаах дьоһун миэрэнэн буолар. Эйэлээх олоххо төннүү киһиттэн улахан уйулҕа күүһүн уонна идэҕэ саҥа хайысхалары эрэйэр. Куонкурус бэтэрээннэр бэйэлэрин күүстэригэр эрэллээх буолалларыгар, инникитин сайдалларыгар күүс биэрэр уонна карьераҕа саҥа суолу тобулалларыгар көмөлөһөр. Ону таһынан, кыттааччылар олоххо үөрэммит тус уопуттарынан үллэстэллэр, атыттарга холобур буолаллар», — диэн Ыччат дьыалаларыгар уонна социальнай коммуникацияларгы миниистирэ, АБДь бэтэрээнэ Петр Шамаев бэлиэтээтэ.

Эрэгийиэннээҕи түһүмэххэ өрөспүүбүлүкэ экэниэмикэтин араас салааларыттан 13 байыаннай дьайыы бэтэрээнэ кыттыыны ылла. Кинилэр ортолоругар — бырамыысыланнай тэрилтэлэр, энергетика, тырааныспар, баһаары утары охсуһар сулууспа, олох-дьаһах хаһаайыстыбатын уонна да атын тэрилтэлэр үлэһиттэрэ бааллар.

Кыттааччылары Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччыта, куонкурус эрэгийиэннээҕи түһүмэҕин бэлэмнээн ыытыыга тэрийэр кэмитиэт бэрэссэдээтэлэ Георгий Степанов эҕэрдэлээтэ.

«Бүгүн биһиги “Иккис старт” номинацияҕа Бүтүн Арассыыйатааҕы куонкурус эрэгийиэннээҕи түһүмэҕин ыытабыт. Быйыл номинация толору байыаннай дьайыы бэтэрээннэригэр аналлаах. Манна идэтинэн уонна специальноһынан хааччахтааһын суох. Куонкуруска Ийэ дойду иннигэр иэстэрин төлөөн баран эйэлээх олоххо төннүбүт уонна бүгүн бэйэлэрин үлэлэринэн өрөспүүбүлүкэ сайдыытыгар кылааттарын киллэрсэр дьон кытталлар. Кыайыылаах Саха сирин аатын Самара куоракка буолар федеральнай түһүмэххэ көмүскүөҕэ», — диэн Георгий Степанов эттэ.

Куонкурус кыттааччыта, «Предприятие теплоснабжения» ХЭТ суоппара Осман Муташев бэтэрээннэргэ маннык тэрээһиннэр суолтата улаханын бэлиэтээтэ.

«АБДь-тан төннүбүтүм кэннэ миигин үлэбэр олус истиҥник көрсүбүттэрэ. Мин бэйэм идэбин таптыыбын уонна дьон иннигэр эппиэтинэспин өйдүүбүн. Маннык куонкурустар киһиэхэ кынат биэрэллэр, өйөбүлү уонна бэйэҕэ эрэбили биллэрэллэр. Бэтэрээннэри умнубаттарын, сыаналыылларын уонна инники сайдалларыгар усулуобуйа тэрийэллэрин өйдүүр олус улахан суолталаах», — диэн кини санаатын үллэһиннэ.

Эрэгийиэннээҕи түһүмэх түмүгүнэн Саха Өрөспүүбүлүкэтин аатын «Иккис старт» номинацияҕа «Идэтинэн бастыҥ» Бүтүн Арассыыйатааҕы куонкурус федеральнай түһүмэҕэр көмүскүүр кыайыылаах быһаарыллыаҕа. «Идэтинэн бастыҥ» Бүтүн Арассыыйатааҕы куонкурус 2012 сыллаахтан ыытыллар. 2025 сылтан кини «Каадырдар» национальнай бырайыак тэрээһиннэригэр киирбитэ уонна Арассыыйа Федерациятыгар идэ таһымын сайыннарарга, нэһилиэнньэ үлэлээх буолуутун өйүүргэ уонна оробуочай идэлэр суолталарын үрдэтэргэ биир сүрүн былаһаакканан буолар.

Саха Өрөспүүбүлүкэтин Ил Дарханын уонна  Бырабыытылыстыбатын пресс-сулууспата

Сиһилии: https://www.sakha.gov.ru/news/52505