“Аҕа дойдуну көмүскээччилэр” пуонда Хаҥалас улууһуттан сылдьар байыаннай дьайыы бэтэрээнэ үлэ буларыгар көмөлөстө

“Аҕа дойдуну көмүскээччилэр” пуонда көмөтүнэн байыаннай дьайыы бэтэрээнэ, Хаҥалас улууһун олохтооҕо Валерий Крысин үлэҕэ киирдэ.

Дойдутугар төннөн баран бэтэрээн “Аҕа дойдуну көмүскээччилэр” пуонда филиалыгар үлэ буларбар көмөлөһүҥ диэн тиийбит. Социальнай сүрүннээччи Екатерина Перевалова Валерийга УФСИН үлэлии киириэххин сөп диэн сүбэлээбит.

УФСИН уонна пуонда филиала бииргэ үлэлэһиилэрин түмүгэр, УФСИН салайааччытын солбуйааччы Анатолий Вальтеры кытта көрсүһүүнү анаабыттар. Кини бастакы күнтэн ыла бэтэрээн үлэҕэ киириитин тус бэйэтинэн хонтуруоллаабыт.

“Үлэ буларбар миигин арыаллаабыттарын, көмөлөспүттэрин иһин “Аҕа дойдуну көмүскээччилэр” судаарыстыбаннай пуонда филиалын социальнай сүрүннээччилэригэр махталбын биллэрэбин”, – диэн Валерий Крысин санаатын үллэстибит.

Байыаннай дьайыыга Валерий эвакуационнай бөлөххө сулууспалаабыт, сири-уоту миинэттэн ыраастааһыҥҥа уонна кимэн киирээччилэр бөлөхтөрө куттала суох ааһалларыгар маршруту ыраастааһыҥҥа кыттыбыт. Эр санаатын иһин “Хорсунун иһин” мэтээлгэ түһэриллибит. Бу туһунан Ил Дархан уонна Бырабыыталыстыба пресс-сулууспата суруйар.