Аҕам саастаах бииргэ төрөөбүттэр тутуспутунан кэлэн куоластаатылар

Үөһээ Бүлүүгэ педагогическай үлэ ветераннара, бииргэ төрөөбүттэр 96 саастаах Тимофеева Ульяна Терентьевна, 89 саастаах Федотова Агидора Терентьевна 79-с №-дээх быыбардыыр учаастакка кэлэн быыбардаатылар.

Ульяна Терентьевна Тимофеева өр сылларга оройуоннааҕы үөрэх салаатыгар инспекторынан, алын сүһүөх кылаас учууталларыгар методиһынан, улуустаааҕы норуот педагогикатын ассоциациятын салайааччытынан таһаарыылаахтык үлэлээн, билигин Бочуоттаах сынньалаҥҥа олорор, Үөһээ Бүлүү улууһун Бочуоттаах олохтооҕо. Саха Өрөспүүбүлүкэтин үөрэҕириитин үтүөлээх үлэһитэ, “Гражданскай килбиэн” анал бэлиэ хаһаайката, РСФСР, ССРС үөрэҕириитин туйгуна, Саха Өрөспүүбүлүкэтин үөрэҕин ситимин Бочуоттаах бэтэрээнэ, Учууталлар учууталлара, педагогическай үлэ, тыыл бэтэрээнэ.