Аҕам саастаах дьон декадата ыытыллар

Аҕам саастаахтар күннэригэр аналлаах декада Саха сиригэр алтынньы 1-10 күннэригэр ыытыллар.

Декада сыала-соруга -– аҕам саастаах көлүөнэ дьонугар кыһамньы, кырдьаҕастарга араас сынньалаҥы тэрийии, көмөнү оҥоруу уонна өрөспүүбүлүкэ олоҕор кинилэр кылааттарын билинии. Тэрээһиннэр Дьокуускай куоракка эрэ буолбакка, өрөспүүбүлүкэ муниципальнай тэриллиилэригэр эмиэ ыытыллыахтара. Бырагыраамаҕа: доруобуйаны чинчийиилэр, быыстапкалар, кэнсиэртэр, айар көрсүһүүлэр, маастар-кылаастар, көмөнү оҥоруу аахсыйалара, анал бырайыактар, тустаах сүбэлэри-амалары биэрии, сыыппаралаах технологияларга уруоктар уо.д.а. киирэллэр. Саха сиригэр «Дьиэ кэргэн» уонна «Уһун уонна көхтөөх олох» национальнай бырайыактар чэрчилэринэр 2025-2030 сылларга «Көхтөөх уһун үйэлэнии» бырагыраама үлэлиир.

Айсен Николаев сорудаҕынан, 100 саастарын туолбут уһун үйэлээхтэргэ «Үйэ саас» бочуоттаах бэлиэни кытары 1 мөлүйүөн солкуобай бэриллэр. Өрөспүүбүлүкэҕэ ураты болҕомто аҕам саастаах дьону социальнай өттүнэн көмүскээһиҥҥэ ууруллар. 2025 сылтан дойдуга Арассыыйа бэрэсидьиэнэ Владимир Путин көҕүлүүр «Дьиэ кэргэн» национальнай бырайыага олоххо киллэриллэр. Бырайыак чэрчитинэн «Кырдьаҕас көлүөнэ» федеральнай бырайыак үлэлиир.
Былырыын уонна быйыл өрөспүүбүлүкэҕэ 10-тан тахса муниципальнай тэриллиигэ көхтөөх уһун үйэлэниигэ муниципальнай бырагыраамалары үбүлүүргэ 14 мөлүйүөн солкуобай бэриллибитэ. Маннык үбү Амма, Алдан, Горнай, Мииринэй, Мэҥэ Хаҥалас,  Нам, Орто Халыма, Таатта, Хаҥалас, Чурапчы, Хаҥалас улуустара, Дьокуускай куорат уонна Жатай ылбыттара.

СӨ Ил Дарханын уонна Бырабыыталыстыбатын пресс-сулууспата.