Ахсынньы 31 күнүн өрөбүлүнэн олохтуур туһунан мөккүөр тохтообот

Үлэ министиэристибэтэ ахсынньы 31 күнүн эбии өрөбүл күнүнэн бигэргэтэргэ наадалааҕынан аахпат. Арассыыйаҕа ылыныллыбыт сокуон тиһигэ өрөбүл күннэри наада буоллаҕына көһөрөргө кыах биэрэр диэн биэдэмистибэ баһылыга Антон Котяков РИА Новости иһитиннэрдэ.

Миниистир санаатынан, эбии өрөбүл күнү олохтооһун үлэ уонна сынньалаҥ күннэрин уопсай балаһыанньатын уларытар чинчилээх.

«Биһиги сокуоммут өрөбүллэри нуорма быһыытынан хамсатарга көҥүллүүрүн учуоттаатахха, ахсынньыга эбии өрөбүлү олохтуур наадата суох дии саныыбын», — диэтэ Котяков.

Кини быһаарбытынан, бырааһынньык уонна өрөбүл күннэри олохтуур бэрээдэк, ону таһынан  көһөрүү быраабылата, РФ Үлэ кодексатыгар чопчу сурулла сылдьар. Бу нуормаларга олоҕуран, сыл аайы өрөбүл күннэрин кыраапыгын бигэргэтэр уураах тахсар. 2027 сылга аналлаах маннык уураах барыла бары сөбүлэһиини ааста, сотору илии баттаныаҕа диэн миниистир эттэ.

2027 сыллааҕы үлэ халандаарын бырайыагынан, Саҥа дьыллааҕы бырааһынньыктар 11 хонук усталаах буолуохтара — 2026 сыл ахсынньы 31 күнүттэн 2027 сыл тохсунньу 10 күнүгэр диэри. Ол аата, ахсынньы 31 күнэ сокуонунан өрөбүл буолбатаҕын да иһин, сыл аайы тахсар уурааҕынан син биир сынньалаҥ күнүнэн биллэриллэр.