Айсен Николаев: “Биһиги Саха сирин Бастакы Бэрэсидьиэнэ Михаил Николаев дьыалатын салгыыбыт”

Ил Дархан Айсен Николаев «Быһа лииньийэ» биэриини арыйарыгар өрөспүүбүлүкэ олохтоохторун Судаарыстыбаннас күнүнэн эҕэрдэлээтэ уонна Саха сирин билиҥҥи устуоруйата Бастакы Бэрэсидьиэн Михаил Ефимович Николаев нэһилиэстибэтин кытта ыкса сибээстээҕин тоһоҕолоон бэлиэтээтэ.

«Бу күн биһиги устуоруйа араас кэрдиис кэмнэригэр өрөспүүбүлүкэни салайбыт, кини дьылҕатын туһугар эппиэтинэһи ылыммыт дьоммутун барыларын ахтан-санаан ааһабыт.

Ордук истиҥник уонна махтананан туран, биһиги Бастакы Бэрэсидьиэммитин Михаил Ефимович Николаевы ахтабыт. Кини саамай уустук 1990-с сылларга бэйэтин биир санаалаахтарын кытта өрөспүүбүлүкэни тутан хаалбыта уонна кинини бигэ сайдыы суолугар таһаарбыта», — диэтэ Айсен Николаев. Кини ыарахан кэмҥэ өрөспүүбүлүкэни салайбыта, биир сомоҕо буоларын ситиспитэ, уонунан сылларга сайдыы төрүттэрин уурбута. Ол бары саҕалааһыннарын киинигэр мэлдьи дьон буолара: үөрэх, доруобуйа, бэйэни сайыннарар кыах, тылы, култуураны уонна үгэстэри харыстааһын.

«Билигин 1990-с сыллар саҥаларыгар ылыллыбыт элбэх быһаарыныы Саха сирэ иннин диэки хардыылыырыгар көмөлөһөр. Бу идиэйэлэр кэми урутаан тахсыбыттара. Биһиги бүгүн Бастакы Бэрэсидьиэммитигэр уонна кини үөлээннээхтэригэр ылыммыт эппиэтинэстэрин, норуоттарыгар уонна төрөөбүт дойдуларыгар муҥура суох тапталларын иһин махтанабыт.

Бастакы Бэрэсидьиэн быһаарыыларынан биһиги бүгүн Арассыыйа эрэгийиэннэрин ортотугар бэйэбитин дьоһуннук сананабыт, иннибит диэки баран иһэбит уонна сайдабыт. Михаил Ефимович дьыалатын саҥа устуоруйа кэрдииһигэр салгыыр уонна сайыннарар биһиги ытык иэспит буолар», — диэн Ил Дархан Айсен Николаев эттэ.  Эрэгийиэн салайааччыта эппитинэн, быйылгы сыл өссө төгүл өрөспүүбүлүкэ эрэллээхтик иннин диэки баран иһэрин көрдөрөр. Аҕыс ый иһигэр бырамыысыланнаска оҥорон таһаарыы 5,2% улаатта. Өлүөнэ муостатын тутуу салҕанар, энэргиэтикэ уонна тырааныспар инфраструктурата сайдар. Балаҕан ыйын саҥатыгар 500 тыһыынча кв.м. кэриҥэ олорор дьиэ үлэҕэ киирбит.  «Арктика синергията» бырайыак чэрчитинэн быйыл аҕыс хайысханан барытынан оптическай-волоконнай сибээс лииньийэлэрин тардыы саҕаланна. Уопсайынан, ВОЛС-ка өрөспүүбүлүкэ нэһилиэнньэтин 93,5%-на олорор 393 нэһилиэнньэлээх пуун холбонно.

«Саамай сүрүнэ — биһиги дьоммут ситиһиилэрэ. Быйыл биһиэхэ отут 100 баалы ылбыт оҕо баар. Креативнай индустрияҕа чаҕылхай ситиһиилэрдээхпитин көрөбүт. Социальнай эйгэ хайдах сайдарын, саҥа оскуолалар уонна балыыһалар арыллалларын көрөбүт.

Ити барыта эрэл кыымын саҕар, Саха Өрөспүүбүлүкэтэ бу сыллар тухары иннин диэки баран иһэригэр, салгыы да бара туруоҕар, биһиги улуу дойдубут биир сүрүн тирэх территорията буолан хааларыгар эрэли үөскэтэр», — диэн Ил Дархан Айсен Николаев эттэ.