Айсен Николаев Чурапчыга 6 оҕолоох байыаннай дьайыы дьиэ кэргэнигэр ыалдьыттаата

Саха Өрөспүүбүлүкэтин Ил Дархана Айсен Николаев Чурапчы улууһугар үлэтинэн сылдьан, байыаннай дьайыы кыттыылааҕа Гаврил Степанов дьиэ кэргэнигэр сырытта. Бу туһунан өрөспүүбүлүкэ салайааччыта «MAX» мессенджергэ иһитиннэрдэ.

Гаврил Степанов 2023 сыл сэтинньи ыйыттан байыаннай дьайыы зонатыгар байыаннай сорудахтары толорор. Хорсун  быһыытын иһин кини Суворов мэтээлинэн уонна да атын наҕараадаларынан бэлиэтэммит. Буойуну дьиэтигэр тапталлаах кэргэнэ Вероника Юрьевна уонна алта оҕото долгуйа күүтэллэр. Улахан оҕолор номнуо үрдүк үөрэх кыһаларыгар үөрэнэллэр, оттон саамай кыралара оҕо уһуйааныгар сылдьар.

Вероника Юрьевна атын байыаннайдар кэргэттэрин кытта түмсэн,  фроҥҥа сылдьар уолаттарга маскировкалыыр сиэккэлэри баайаллар, ыарахан түгэҥҥэ бэйэ-бэйэлэригэр өйөбүл буолаллар. Биир дойдулаахтара дьоруой дьиэ кэргэнигэр дьиэ-уот үлэтигэр, муус, мас бэлэмнээһинигэр мэлдьи көмөлөһөллөр.

«Биһиги алта оҕолоох иллээх-эйэлээх дьиэ кэргэммит. Өрөспүүбүлүкэ уонна улуус өттүттэн бары көрүллүбүт көмөнү толору ылабыт. Олохтоох салалта, биир дойдулаахтарбыт хаһаайыстыбаҕа, муус, мас бэлэмнээһинигэр куруук көмөлөһөллөр. Биһиги, байыаннай сулууспалаахтар дьиэ кэргэттэрэ, фроҥҥа сылдьар уолаттарбытыгар көмөлөһөр туһуттан бары бииргэ түмүстүбүт: маскировкалыыр сиэккэлэри баайабыт уонна хаһаайыстыбаны көрүүгэ бэйэ-бэйэбитигэр өйөһөбүт», — диэн кэргэнэ Вероника Юрьевна кэпсээтэ.

Айсен Николаев буойун Гаврилга уонна фроҥҥа сылдьар бары уолаттарга этэҥҥэ, тыыннаах уонна Кыайыы көтөллөөх дьиэлэригэр эргиллэн кэлэллэригэр баҕарда. Ил Дархан бэлиэтээбитинэн, өрөспүүбүлүкэ инникитин даҕаны анал байыаннай дьайыы кыттыылаахтарыгар уонна кинилэр дьиэ кэргэттэригэр бары өттүнэн көмөлөһүөҕэ.

«Сэрии хонуутуттан төннүбүт, билигин Ийэ дойдуларын көмүскүү сылдьар уолаттарбытын уонна кинилэр дьиэ кэргэттэрин өйүүр — биһиги уопсай ытык иэспит буолар. Биһиги кинилэри мэлдьи өйүөхпүт», — диэн Айсен Николаев эттэ. (Сиһилии: sakha.gov.ru).