Айсен Николаев муус устар ыйга Уһук Илин эрэгийиэннэрин баһылыктарын медиа-рейтинин баһылаата

«Медиалогия» муус устар ыйдааҕы губернатордар медиа-рейтиннэрин бэлэмнээтэ.

Уһук Илиҥҥи федеральнай уокурук эрэгийиэннэрин баһылыктарын ортотугар Саха сирин Ил Дархана Айсен Николаев эмиэ бастаата.

Биир ый иһигэр кини аата ахтыллар 13 425 иһитиннэрии СМИ-гэ тахсыбыт, оттон МедиаИндекса 51 902,9 баалга тэҥнэспит. Иккис миэстэҕэ — Сахалин уобалаһын губернатора Валерий Лимаренко (5 013 иһитиннэрии, 22 017,5 баал), үһүскэ — Хабаровскай кыраай баһылыга Дмитрий Демешин (6 484 иһитиннэрии, 17 342,1 баал).

Муус устарга СМИ-лэр Айсен Николаевка болҕомтолорун ууруулара, бастатан туран, муус устар 27 күнүгэр, Өрөспүүбүлүкэ күнүгэр, ыыппыт «Быһа лииньийэттигэр» сыһыаннаах. Эпиир кэмигэр Айсен Николаев Арктика улуустарын олохтоохторугар субсидиялаах авиабилиэттэри сөргүтэр туһунан биллэрбитэ, ону таһынан 2000-с сыллар саҕаланыыларыттан саха киинэтин уопсай харчы хомууругар 961 мөл. солкуобайга тиийбитин кэпсээбитэ.

Муус устарга Николаев эмиэ мэдиссиинэ уопсастыбатын кытта көрүстэ, онно «Доруобуйа уон сылын» маҥнайгы биэс сылын түмүктэрин таһаарда. Маны таһынан, кини «Медведь» позывнойдаах Арассыыйа Дьоруойа Алексей Петров сырдык кэриэһигэр сүгүрүйдэ. Бүтүн Арассыыйатааҕы эрэгийиэннэрин баһылыктарын рейтиннэригэр Айсен Николаев 24-с миэстэни ылла, ааспыт ыйы кытта тэҥнээтэххэ аҕыс позициянан үрдээтэ. Арассыыйаҕа бастакы үс миэстэни Москва мээрин Сергей Собянин, Москва уобалаһын губернатора Андрей Воробьев уонна Белгород уобалаһын баһылыга Вячеслав Гладков ыллылар.

«Медиалогия» МедиаИндекса — хаачыстыбаны көрдөрөр бэлиэ, кини таһаарыы ахсаанын эрэ буолбакка, төһө дьайыылаах источнигын, ахтыллар ис хоһоонун эбэтэр сыанабылын, иһитиннэриигэ персоната хайдах оруоллааҕын (сүрүн эбэтэр быстах) учуоттуур.