Айсен Николаев: «Ойуур баһаардарын умуруоруу түргэтээтэ»

Быйыл  баһаартан сэрэхтээх кэм саҕаланыаҕыттан   ойуур баһаардарын умуруоруу үлэтэ түргэтээбитин туһунан Ил Дархан Айсен Николаев «Якутия, вперед!» биэриигэ эттэ.

Эрэгийиэн салайааччыта эппитинэн, маннык үрдүк көрдөрүү ойуур баһаарынай сулууспатын бөҕөргөтүүнэн уонна федеральнай өйөбүл биллэ улаатыытынан ситиһиллибит.

«Кэлиҥҥи икки сылга Арассыыйа Бэрэсидьиэнин быһаарыытынан бэриллибит үп-харчы уонна федеральнай үбүлээһин эбиллиитин түмүгэр, биһиги Алдан, Ленскэй, Эдьигээн  уонна Орто Халыма улуустарыгар түөрт саҥа авиа-этэрээти арыйдыбыт. Үлэһит ахсаана эмиэ улаатта: билигин бу хайысхаҕа балтараа тыһыынча киһи кэриҥэ үлэлиир», — диэн өрөспүүбүлүкэ баһылыга бэлиэтээтэ.

2026 сылга ойуур баһаардарын сэрэтиигэ, кэтээн көрүүгэ, умуруорууга 5,5 млрд солкуобай көрүллүбүт, итинтэн 4,1 млрд солкуобайа федеральнай бүддьүөт үбэ буолар.