Айсен Николаев «Саха сирэ — дьоруойдар дойдулара» каадыр бырагырааматын бүтэрээччилэригэр дипломнары туттарда

Дьокуускайга ыам ыйын 8 күнүгэр 1 №-дээх Бырабыытылыстыба дьиэтигэр «Саха сирэ — дьоруойдар дойдулара» эрэгийиэннээҕи каадыр бырагырааматын бүтэрээччилэригэр дипломнары үөрүүлээхтик туттарыы сиэрэ-туома буолан ааста.

Тэрээһиҥҥэ Саха сирин Ил Дархана Айсен Николаев, байыаннай  дьайыы кыттыылаахтара, судаарыстыбаннай былаас уорганнарын, уопсастыбаннай тэрилтэлэр бэрэстэбиитэллэрэ, үөрэх бырагырааматын настаабынньыктара уонна эспиэрдэрэ кытыннылар.

Үөрэҕи бүтэрээччилэргэ туһаайан, Айсен Николаев бырагыраама кыттыылаахтара эйэлээх олоххо уопсастыбаҕа салгыы сулууспалыыр, бэйэлэрин уопуттарын, бэрээдэктэрин уонна эппиэтинэстэрин Саха сирин туһатыгар туһанар баҕаларын өрөспүүбүлүкэ үрдүкү сыаналыырын бэлиэтээтэ. Ил Дархан бу бырагырааманы олохтооһун Аҕа дойдуну көмүскээччилэртэн дойду саҥа салайар араҥатын тэрийэр улахан судаарыстыбаннай соругун биир сорҕото буолбутун эттэ.

«Биһиги Бэрэсидьиэммит Владимир Владимирович Путин байыаннай дьайыы кыттыылаахтара Арассыыйа саҥа элитата буолуохтаахтарын бэлиэтиир. Уонна бүгүн манна, биһиги саалабытыгар — байыаннай дьайыылар бэтэрээннэрэ, Бэрэсидьиэммит «Дьоруойдар кэмнэрэ» («Время героев») бырагырааматын холобурунан кини тус сорудаҕынан тэриллибит уонна маннык көрүҥүнэн бастакы эрэгийиэннээҕи бырагырааманан буолбут «Саха сирэ — дьоруойдар дойдулара» каадыр бырагырааматын бүтэрээччилэрэ бааллар. Мин үөрэҕи бүтэрээччилэрбитин үөрэхтэрин ситиһиилээх түмүгүнэн, дипломнай бырайыактарын ситиһиилээхтик көмүскээбиттэринэн эҕэрдэлиэхпин баҕарабын. Биһиги уопсастыбабытыгар туһаны аҕалар, салгыы дьон туһатыгар сулууспалыыр баҕаҕытын үрдүкү сыаналыыбыт. Бырагырааманы үлэҕэ киллэрэр туһунан быһаарыы ылылларыгар, биһиги иннибитигэр дьэҥкэ уонна өйдөнөр соругу туруоруммуппут — Аҕа дойдуну көмүскээччилэри төрөөбүт өрөспүүбүлүкэлэрин салайыыга кытыннарар туһугар саамай үчүгэй кыахтары биэрии», — диэтэ Айсен Николаев.

Саха сирин Ил Дархана бырагыраама кыттыылаахтара үөрэнэр кэмнэригэр уустук уонна ис хоһоонноох суолу ааспытын, оттон үөрэх дьайыытыгар биллиилээх эспиэрдэр кыттыбыттарын уонна бэлэмнээһин аныгы формааттара туһаныллыбыттарын бэлиэтээтэ. Кини этэринэн, ылбыт билиилэрэ уонна уопуттара үөрэҕи бүтэрээччилэр салгыы үлэлэригэр эрэллээх акылаат буолуоҕа. Сиһилии: https://www.sakha.gov.ru/news/47674