Айсен Николаев: улуустарга баһылыктары талыы саҥа бэрээдэгэ быһыыны-майгыны бигэ оҥордо

Бүгүн Ил Дархан Айсен Николаев «Саха» НКИХ быһа эпииригэр муниципальнай тэриллиилэр баһылыктарын талар саҥа ньыма улуустарга уонна нэһилиэктэргэ быһыыны-майгыны бигэ оҥордо диэтэ.

Кини бу быһаарыы олохтоох дьокутааттар оруолларын күүһүрдүбүтүн бэлиэтээтэ. Айсен Николаев эппитинэн, былааска «сүрэх баҕатынан», төрөөбүт дойдулара сайдыытыгар интэриэстээх дьон кэлиэхтээх. Ону таһынан кини Дьокуускайга үлэлээбит уопуттаах исписэлиистэр төрөөбүт-үөскээбит улуустарыгар төннөн салайар үлэҕэ кэлэр кыахтаммыттарын тоһоҕолоон эттэ.
Ол холобурунан саҥа талыллыбыт баһылыктары ааттаталаата. Холобур, Максим Терещенко (Нерюнгри улууһа) урут СӨ бырамыысыланнаска миниистирэ, Анаабыр улууһун баһылыга — урут экология миниистирин бастакы солбуйааччыта, оттон Степан Саргыдаев (Чурапчы улууһа), дьокутааттар бары биир санаанан өйөөн, болдьоҕун иннинэ талыллыбыт.