Айсен Николаев Владимир Путин салайыытынан ыытыллыбыт нацбырайыактар мунньахтарыгар кытынна

Саха сирин Ил Дархана Айсен Николаев Арассыыйа бэрэсидьиэнэ Владимир Путин салайыытынан ыытыллыбыт Стратегическай сайдыыга уонна национальнай бырайыактарга Сүбэ мунньаҕар кытынна. Бу туһунан өрөспүүбүлүкэ салайааччыта «MAX» мессенджергэ бэйэтин страницатыгар иһитиннэрдэ.

Мунньахха Владимир Путин бэлиэтээбитинэн, национальнай бырайыактар олоххо киириилэрин сүрүн көрдөрүүтүнэн норуот, дьон бэйэтин сыанабыла буолуохтаах. Айсен Николаев ити этиини толору өйүүрүн биллэрдэ.

«Хас биирдии сыыппара, көрдөрүү кэннигэр киһи күннээҕи олоҕо, дьиэ кэргэн уйгута уонна инникигэ эрэлэ турар. Онон дьон санаата уонна сыанабыла  салалта быһаарыыларын ылыныыга сүрүн олук буолуохтаах», — диэн Ил Дархан бэлиэтээтэ. Мунньах биир сүрүн тиэмэтинэн эрэгийиэннэр үптэрин-харчыларын туруга буолла. Саха сирин курдук киэҥ нэлэмэн территориялаах, уустук логистикалаах уонна тутуута үрдүк сыаналаах эрэгийиэҥҥэ, федеральнай мэхэньиисимнэр көмөлөрүнэн социальнай эбээһинэстэри кэмигэр толорорго, сайдыыны былаанныырга уонна саҥа инфраструктураны тутарга толору кыах бэриллиэхтээҕэ этилиннэ.

Маны таһынан, анал байыаннай дьайыы кыттыылаахтара сулууспаларын түмүктээн дойдуларыгар эргиллэн кэлэллэрин боппуруоһа дириҥник көрүлүннэ. Саха сиригэр билигин даҕаны ити хайысхаҕа өйөбүл тиһигэ тохтоло суох үлэлиир: «Аҕа дойду көмүскээччилэрэ» пуонда филиала арыаллааһыҥҥа үлэлиир, үлэ миэстэтигэр кубуота бэриллэр, социальнай хантараактар түһэрсиллэллэр уонна «Саха сирэ — Дьоруойдар сирдэрэ» диэн каадыр бырагыраамата олоххо киирдэ.

Мунньахха судаарыстыбаннай бырагыраамаларга бэтэрээннэргэ уонна кинилэр дьиэ кэргэттэригэр анаммыт туспа тэрээһиннэри ыытар туһунан этии оҥоһулунна. Бу баар өйөбүл мэхэньиисимнэри бииргэ түмэргэ уонна чопчу түмүктэри ситиһэргэ көмөлөһүөҕэ.