Уран тарбахтаахтар ураты үлэлэрин биһирээтилэр

Бу күннэргэ Хакасия Өрөспүүбүлүкэтин Абакан куоратыгар «Шерстяные чудеса» диэн эрэгийиэннэр икки ардыларынааҕы куонкурустара буолла.

Уран тарбахтаахтар С.П. Кадышев аатынан норуот айымньытын киинигэр түмүстүлэр. Күрэскэ Хакасияттан, Тываттан, Красноярскайтан 40 тахса маастар кыттыыны ылла. Саха сириттэн манна Горнай улууһуттан Бэрдьигэстээхтэн «Тиһилик» диэн норуот маастардарын түмсүүтүн кыттыылааҕа, «Сардаана» уһуйааҥҥа логопед иитээччинэн үлэлиир Айталина Васильевна Санникова кытынна.

Күн бастакы аҥарыгар кыттааччылар бэйэлэрин билиһиннэрдилэр, күрэскэ оҥорон аҕалбыт таҥастарын, сатабылларын көрдөрдүлэр уонна хатайданан оҥоһуллубут үтүлүк күрэһигэр кытыннылар. Бу күн түмүгүнэн «Традиционный конкурс на пару варежек» куонкурус «Этнотрадиции» номинациятыгар биһиги маастарбыт Айталина кыайыылаах үрдүк аатын ылла! Саха сирин маастара Айталина оҥорон таһаарар үлэтин техникаларын, хас биирдии панно уратытын, хатайданан тахсыбыт оҥоһукка Саха сирин ураты кэрэтэ, хоту дойду тыйыс тымныыта харахха тута быраҕылларын көрүөххэ сөбүн тэрээһиҥҥэ кэлбит, көрбүт дьон барыта биһирээтэ, хайҕаата. Бэстибээл-күрэс түмүгүнэн Айталина Санникова өссө ыытыллыахтаах күрэскэ ыҥырыы ылла уонна араас дойду маастардарын кытта уопутун атастаһан билиитин хаҥатта.

Бу айаммыт сырыытыгар биһигини өйөөбүт, далааһыннаах тэрээһиҥҥэ ыыппыт Олоҥхо дьиэлэрин биир кэлим ситимин, улуустары кытта бииргэ үлэлэһэр салайааччыбытыгар Евдокия Николаевна Ивановаҕа, Горнай улууһун Олоҥхо дьиэтин салайааччытыгар Александра Владимировна Алексееваҕа улахан махталбытын тиэрдэбит.

Анастасия Васильева,

духуобунас киинин уус-уран салайааччыта.

Бэрдьигэстээх, Горнай.

Хаартыскалар ааптар тиксэриилэрэ.