Алааһым оһуордаах Оһуокайа

Чурапчы улууһун норуот айымньытын киинин салайааччыта Д.Д.Попов быһаччы былааҥҥа киллэрэн, өрөспүүбүлүкэтээҕи  «Оһуокай» түмсүүтүн этээччилэрин ыҥыран, алтынньы 15 күнүгэр Чурапчыга «Айылгы» култуура киинигэр оһуокайга сэминээр-практикум ыытылынна.

Быйылгы ааһан эрэр сылга Чурапчы улууһун кытары төрдүс төгүлүн көрсүһэн, кыттыгас тэрээһини ыыттыбыт. Быйыл  тохсунньу 11 күнүгэр «Арчы» дьиэтигэр Дмитрий Дмитриевич Чурапчыттан үҥкүү тылын этээччилэрин, куоракка олорор биир дойдулаахтарын түмэн, Чурапчы оһуокайын үрдүк таһымнаахтык ыыппыппыт. Ол кэнниттэн саас Мугудайга Олоҥхо ыһыаҕа ыытылларынан сибээстээн,  түмсүүбүтүттэн түөрт буолан тахсан, үөрэнээччилэргэ оһуокайга маастар-кылаас ыыппыппыт.
Быйылгы сыл түмүктүүр үлэбитигэр чурапчылар улуус киинигэр ыҥыран тэрээһини ыыппыттара хайҕаллаах. Болтоҥоттон, Хатылыттан үҥкүү тылын этэр оҕолор киирэн таҕыстылар. Куораттан быйыл Дархан этээччи аатын ылбыт Данил Пестряков кураторынан ананан, бу тэрээһиҥҥэ салайааччыбыт Александр Джурович өйөбүлүнэн тахсан киирдибит.

Сэминээр бастакы чааһыгар түмсүү туһунан Дархан этээччи, Чурапчыга оһуокай куратора Данил Михайлович бэйэтин санаатын үллэһиннэ. Дархаттар сүбэлэрин бэрэссэдээтэлэ, Дархан этээччи Валентин Хорунов Тааттаҕа лааҕыр үлэтэ оһуокайга ананан ыытыллыбытын кэпсээтэ. Чурапчыга үтүөлээх этээччибит Мария Марковна Иванова саамай кэтэһиилээх киһи буолла. Кини Дьокуускай куоракка баҕалаах оҕолору кытта оһуокайга хайдах үлэлии сылдьарын кэпсээнэ болҕомтону тарта. Билигин кистэл буолбатах, оҕолору кытары үлэ  өрөспүүбүлүкэҕэ  олус күүстээхтик барар дииргэ ыарахан. Оскуолаларга сахалыы үөрэтиигэ, фольклору эбии үөрэтиигэ балаһыанньа биллэ уустук. Онон, куорат усулуобуйатыгар үлэлиир 2-с нүөмэрдээх оскуолата хайдах ылсыһан үлэлиирин кэпсээтэ. Бэйэтин кытары Чурапчыга куратор Д.М.Пестряков көрдөһүүтүнэн үс үөрэнээччитин илдьэ тахса сырытта. Сэминээр иккис чааһыгар алтыс кылаас үөрэнээччилэрэ Уля Егорова, Оля Мухоплева тутатына Чурапчы туһунан хоһуйан этэн,  кыттааччылары  сөхтөрдүлэр. Маны сэргэ кыргыттар куоластара да аһаҕас, этэргэ олус баҕалаахтара сөхтөрдө. Оля тахсар күммүтүгэр аҕыс чааска диэри тэрээһиҥҥэ сылдьан, сарсыныгар бастакы таксинан кэлэн кыттыбыта. Үһүс кылаас үөрэнээччитэ Сайнаара Павлова эмиэ оһуокайга олус тардыһыылааҕын, иҥнибэккэ этэринэн эмиэ уратылаах. Улялаах, Оля куоракка биһиги тэрээһиннэрбитигэр, ол иһигэр  Кыайыы, куорат күнүн оһуокайдарыгар мэлдьи кэлэн кытталлар.

Сэминээр бастакы чааһыгар Дмитрий Дмитриевич түмсүү хайдах былааннаах үлэни ыытарбытын кэпсииргэ көрдөспүтүгэр, «Арчы» дьиэтигэр 2025 сылтан Кыайыы 80 сыла, Сомоҕолоһуу Оһуокайдарын куоракка олорор биир дойдулаахтар оһуокайдарын хайдах түмэн үлэлиирбин кэпсээтим. Маны тэҥэ Дархан этээччилэрбит Сунтаартан Лариса Иванова, Мэҥэ Хаҥаластан Станислав Иванов, Виталий Никифоров ыһыахтарга, күрэхтэргэ ситиһиилэрин кэпсээтим.
Тэрээһин  иккис чааһын үтүөлээх этээччилэр Ил Дархан Оһуокайга стипендиаттара Валентина Дьячковская,  Семен Морфунов, куораттан Дархан этээччи Марта Николаева, үтүөлээх этээччи Мария Иванова ыыттылар. Чурапчыга оҕолорго үҥкүү тылын этэргэ Валентина Ивановна айымньылаахтык үлэлии сылдьарын үрдүктүк биһириибит. Кини үөрэнээччилэрэ Болтоҥоттон Саян Максимов, Таня Назарова эттилэр. Саян ааспыт сылга СӨ Бырабыыталыстыбата тэрийэн ыытар оҕолорго конкуруһугар кыттыбыт. Быйыл эмиэ бэлэмнэнэ сылдьар. Маны сэргэ Хатылыттан Артем Лебедкин, Карина Прокопьева эттилэр.
Түмүктүүр чааһыгар Дмитрий Дмитриевич кэлэр сылга Болтоҥоҕо ыһыахха оһуокайга тахсан кыттан көмөлөһөргө уонна тохсунньу ыйга сэминээр ыытыллара былааннаммытын эттэ уонна «Оһуокай» түмсүүтэ хайаан да кыттарга ыҥырда.

Марта Николаева