Алдаҥҥа уулуссалары өрөмүөннээтилэр

2 446 миэтэрэ усталаах Мэҥэ Хаҥалас уулуссатыгар суолга наадалаах үлэ барыта оҥоһулунна: айанныыр чааһа бэлэм, киирэр-тахсар сирдэр, тротуардар уонна бордюрдар толору оҥоһулуннулар,  күрүөлэрэ турдулар. 1 355 миэтэрэ усталаах Ортосалинскай уулуссаҕа киирэр-тахсар сирдэри, тротуардары, бордюр күрүөтүн уонна ууну сүүрдэр ханаабаны оҥоруу үлэтэ түмүктэннэ. Ууну сүүрдэр ханааба оҥоһдьллан, ардах кэнниттэн уу түргэнник барыаҕа.

800 миэтэрэ усталаах Зинштейн уулуссатыгар былааннаммыт үлэ барыта толорулунна: бэлэмнэнии үлэлэрэ, сир балаһата, сүрүн трасса, киирэр-тахсар сирдэр, суолу бүрүйэр  асфальт-бетон араҥата, тротуар, бордюр, күрүө, ууну сүүрдэр ханааба уонна суол кытыытын бөҕөргөтүү.

Уулуссалар олохтоох суолталаах III категориялаах суолларга киирэллэр: айанныыр чааһын кэтитэ 3,5 м, тротуар кэтитэ — 1,5 м. Үлэ барыта болдьоҕор түмүктэннэ.

«2025 сылга «Олох-дьаһах инфраструктурата» национальнай бырайыак чэрчитинэн Алдан улууһугар 5,08 км суол өрөмүөннэммитэ. Быйыл алтынньыга диэри 4,7 км уулусса-суол ситимэ киллэрилиннэ. 2020 сылтан 2025 сылга диэри улуус сиригэр-уотугар 32 км  суол өрөмүөннэммитэ. 2031 сылга диэри уопсай уһуна 45 км 52 уулуссаны нуормаҕа эппиэттиир турукка тиэрдэр былааннаахпыт. Ити сыалга 2 млрд солк. кэриҥэ үп ыытыллыаҕа», — диэн Алдан улууһун баһылыга Александр Шестопалов бэлиэтээтэ.

«Суол өрөмүөнэ, биллэн турар, үөрдэр. Суоппардарга эрэ буолбакка, сатыы дьоҥҥо эмиэ толкуйдаан, барытын кэлимник оҥороллоро үчүгэй. Сонно тута тротуардары уонна ааһар дьоҥҥо куттал суох буолуутугар күрүөлэри оҥороллор», — диэн Алдан олохтооҕо Александр Васильев үллэһиннэ.

Санатар буоллахха, Саха Өрөспүүбүлүкэтигэр «Олох-дьаһах инфраструктурата» национальнай бырайыагынан 2026 сылга 95 км массыына суолун нуормаҕа эппиэттиир турукка тиэрдэр былааннаахтар. Ол иһигэр 75 км — эрэгийиэннээҕи суолталаах, 6,9 км — Дьокуускай куорат агломерациятыгар киирэр олохтоох суолталаах. Ону таһынан 20 тыһыынчаттан тахса киһилээх кыра агломерацияларга 12,5 км саҥардыллыаҕа.

Национальнай бырайыагы Саха сиригэр 2030 сылга диэри олоххо киллэрии салҕаныаҕа. Суолга сылдьыы куттала суох буолуутун хааччыйыы уонна өрөспүүбүлүкэ олохтоохторугар табыгастаах усулуобуйаны тэрийии бастакы күөҥҥэ турар.

«2025 сылга «Олох-дьаһах инфраструктурата» национальнай бырайыак көмөтүнэн 130,69 км суол саҥардыллыбыта. Быйыл алтынньыга диэри суол бүрүйэр араҥатын оҥоруу үлэтэ 93,5% туолла: сүрүн кээмэйдэр номнуо олоххо киирдилэр, сорох учаастактары ситэрэн оҥоруу хаалла. 2031 сылга диэри 508 км кэриҥэ массыына суолун нуормаҕа эппиэттиир турукка аҕалар былааннаахпыт. Бу сорук суол үлэтин бырагырааматыгар бигэргэтиллибитэ», — диэн өрөспүүбүлүкэ тырааныспарга уонна суол хаһаайыстыбатыгар миниистирэ Владимир Сивцев тоһоҕолоон бэлиэтээтэ.