Александр Моедо суукканы быһа сүүрүүгэ кыһыл көмүс мэтээли ылла

Александр Моедо уонна Павел Васильев Арассыыйа Куубагар суукканы быһа сүүрүүгэ кыһыл уонна үрүҥ көмүс мэтээллэри ыллылар.

Вологдаҕа Арассыыйа Куубага түмүктэннэ, онно Саха сирин спортсменнара икки мэтээли ыллылар.  Өрөспүүбүлүкэттэн күрэхтэһиигэ 15 спортсмен кытынна.

Сүрүн ситиһиини Александр Моедо аҕалла. Кини эр дьоҥҥо бастаата уонна норуоттар икки ардыларынааҕы кылаастаах успуорт маастарын аатын бигэргэттэ.

Үрүҥ көмүс мэтээли Павел Васильев ылла. Артем Артемьев бэһис миэстэҕэ таҕыста. Иккиэн бу көрдөрүүлэринэн Арассыыйа успуордун маастарын нуорматын толордулар.

Саха Өрөспүүбүлүкэтин чэпчэки атлетика федерациятын толорооччу дириэктэрэ Василий Спиридонов эппитинэн, спортсменнар көрдөрүүлэрэ — бу чэпчэки атлетика саамай ыарахан көрүҥнэриттэн биирдэстэригэр кичэйэн туран бэлэмнэммиттэрин түмүгэ.