Александр Шохин: «Уматык кыһалҕатын дьоҕус НПЗ тутуута быһаарыан сөп»

Арассыыйа  урбаанньыттарын сойууһун бэрэсидьиэнэ Александр Шохин Дьокуускайга ыытыллыбыт тэрээһиҥҥэ  уматыгы тиэйии кыһалҕатын быһаарар биир суолунан ньиэп бородуукталарын таҥастыыр дьоҕус собуоттары тутуу буолуон сөбүн туһунан санаатын үллэһиннэ.

Кини бу туһунан РСПП эрэгийиэннээҕи холбоһуктарын координационнай сэбиэтин мунньаҕар эттэ. Александр Шохин бэлиэтээбитинэн, Саха сиригэр уматыгынан хааччыйыы боппуруоһа хоту таһаҕаһы тиэйии уустук логистикатыттан сытыытык турар.

«Үлэлиир хайысха элбэх, ол иһигэр дьоҕус НПЗ тутуутугар болҕомтону ууруохха сөп. Маннык собуоттар экология ирдэбилинэн, намыһах кылаастаах уматыгы оҥорон таһаарыахтарын сөп. Ол эрээри, ити уматык тыа хаһаайыстыбатын, хомунаалынай тиэхиньикэни уонна биирдиилээн дьону сөптөөх сыанаҕа, наадалаах кээмэйинэн уматыгынан толору хааччыйарга сөп түбэһэр», — диэн РСПП бэрэсидьиэнэ тоһоҕолоон бэлиэтээтэ.

Кини санаатынан, маннык оҥорон таһаарыыны сайыннарыы ыраах сытар, суола-ииһэ суох сирдэри чэпчэки сыаналаах уматыгынан хааччыйыы кыһалҕатын быһаарарга төһүү күүс буолуоҕа. Бу этии хотугу улуустар олохтоохторугар уонна тыа хаһаайыстыбатын салаатыгар улахан өйөбүлүнэн буолуон сөп.