Аммаҕа туризм баазатын тутууга көрүллүбүт харчыны уорбут салайааччы сууттаныаҕа

Өрөспүүбүлүкэ борокуруора Сергей Дябкин кэммиэрчэскэй тэрилтэ салайааччытын утары РФ Холуобунай кодексатын 159-с ыстатыйатын 4-с чааһынан (улахан кээмэйдээх түөкүннээһин) тэриллибит холуобунай дьыала буруйдуур түмүгүн бигэргэттэ. Бу туһунан СӨ Борокуратуурата иһитиннэрэр.

Силиэстийэ барылынан, буруйданааччы «Туризм уонна ыалдьытымсах буолуу индустрията» нацбырайыак чэрчитинэн ыытыллыбыт күрэх түмүгүнэн, өрөспүүбүлүкэ бүддьүөтүттэн «Амма улууһун Амма сэлиэнньэтигэр успуорт уонна туризм баазата» бырайыагы олоххо киллэрэргэ анаан субсидия ылбыт. Ол эрээри, кини бэйэтигэр ылбыт эбээһинэһин толорботох уонна тустаах сорукка эрэ тутуллуохтаах үбүнэн бэйэтин баҕатынан дьаһаммыт.

Өрөспүүбүлүкэ бүддьүөтүгэр тахсыбыт хоромньу кээмэйэ 5,3 мөл. солкуобайы куоһарбыт.

Силиэстийэ кэмигэр дьахтар 8,7 мөл. солкуобайтан тахса суумалаах баайыгар-дуолугар арест уурулунна.