Анал байыаннай дьайыы кыттыылааҕа Николай Григорьев сырдык аатыгар боксаҕа бастакы өрөспүүбүлүкэтээҕи турнир ыытылынна

Сунтаар улууһугар уолаттарга боксаҕа өрөспүүбүлүкэтээҕи бастакы турнир ыытылынна. Күрэхтэһии анал байыаннай дьайыы кыттыылааҕа, «Сунтаар» позывнойдаах Николай Николаевич Григорьев сырдык аатыгар ананна.

Николай Григорьев Сирияҕа буолбут байыаннай дьайыыга уонна анал байыаннай дьайыыга  кыттыбыта. Хорсун уонна бэриниилээх быһыытын иһин кини I-кы истиэпэннээх «За воинскую доблесть» мэтээлинэн уонна өлбүтүн кэннэ «Хорсунун иһин»  уордьанынан наҕараадаламмыта.

Күрэхтэһиигэ 40-тан тахса эдэр спортсмен кытынна. Турнир үрдүк тэрээһиннээхтик ааста. Кыттыылаахтар  бэлэмнэрин, тиэхиникэлэрин уонна кыайыыга дьулуурдарын көрдөрдүлэр.

Николай Григорьев дьиэ кэргэнигэр турнир кини сырдык аатын үйэтитэр улахан суолталаах тэрээһининэн буолла. Хорсун буойун төрөппүттэрэ – Лилия Леонидовна уонна Николай Николаевич – уолларын киэн тутта ахталлар. Николай оҕо эрдэҕиттэн боксанан дьарыктаммыта, оскуолаҕа үөрэнэр сылларыгар өрөспүүбүлүкэ уонна Уһук Илин чөмпүйүөнэ буолбута. Оскуоланы бүтэрээт, Москватааҕы физико-тэхиниичэскэй институкка үөрэнэ киирбитэ. Убайа өлбүтүн кэннэ, Николай бэйэтин баҕатынан фроҥҥа барарга быһаарыммыт.

Дьиэ кэргэҥҥэ байыаннай дьайыылар бэтэрээннэрэ өйөбүл буоллулар. Сунтаар улууһун байыаннай дьайыыларын бэтэрээннэрин Сүбэтин аатыттан кинилэр спортсменнарга бириистэри туттардылар.

Николай Григорьев дьиэ кэргэнэ «Аҕа дойдуну көмүскээччилэр»  Судаарыстыбаннай пуонда Саха сиринээҕи филиалын толору көрүүтүгэр-истиитигэр баар. Социальнай координатор Варвара Яковлева төрөппүттэри кытта мэлдьи сибээһи тута сылдьар, үөскүүр боппуруостары барытын быһаарарга көмөлөһөр.

«Николай аата умнуллубата уонна кэлэр көлүөнэлэргэ бэриллэрэ олус суолталаах. Турниры инникитин эмиэ ыытар былааннаахтар. Биһиги бэйэбит өттүбүтүттэн дьиэ кэргэни салгыы арыаллыахпыт уонна наадалаах көмөнү оҥоруохпут», — диэн «Аҕа дойдуну көмүскээччилэр» пуонда филиалын социальнай координатора Варвара Яковлева бэлиэтээтэ.

«Аҕа дойдуну көмүскээччилэр» пуонда Саха сиринээҕи филиалын иһитиннэриитинэн.

Сиһилии: https://www.sakha.gov.ru/news/64985