Антология кэпсээннэрэ — иллюстратор-худуоһунньуктар дипломнай үлэлэригэр

Бэс ыйын 15 күнүгэр Дьокуускайга Ускуустуба, култуура уонна креативнай индустриялар Арктикатааҕы судаарыстыбаннай университеттарыгар кинигэҕэ уруһуйдуур иллюстратор-худуоһунньуктар дипломнай бырайыактарын көмүскээтилэр.

Мин Москваҕа Литература институтугар тахсыбыт Саха сирин суруйааччыларын кэпсээннэрин антологиятын  электроннай көрүҥүн  былырыын университет живописка уонна графикаҕа кафедратыгар  үөрэххэ эбии матырыйаал быһыытынан тиксэрбитим. Преподавателлар ону үөрэ-көтө ылыммыттара.

Кинигэҕэ 39 ааптар кэпсээнэ киирбитэ. 2-с уонна 4-с  куурус иллюстратор-устудьуоннара сорох кэпсээннэри курсовой үлэлэригэр ылбыттара. Онтон 8 кэпсээн дипломнай бырайыакка туһанылынна.

Эдэр иллюстратордар  Анна Варламова «Белый платок Ылджаны»,  Татьяна Находкина «Дамский велосипед», Лена Седар «Мальчик и луна”,  Ангелина Шадрина «Солдат последнего рубежа», Айсен Дойду «Заснеженные ели»,  Дмитрий Наумов «Кэрэмэс» кэпсээннэригэр  болҕомтолорун уурбуттар.

Устудьуоннар прикладной бырагыраамалар көмөлөрүнэн уруһуйдьукка аналлаах улахан графическай планшеттарга уруһуйдаабыттар. Ол түмүгэр аныгылыы, чаҕылхай бырайыактар тахсан кэлбиттэр. Бырайыактарга олоҕуран анимация да киинэлэрин устуохха сөп.

Мин көрүүбүнэн, маннык үлэлэри бастыҥынан сыаналаатым: Айсара Еремеева ——  «Белый платок Ылджаны», Саша Леонтьева —  «Дамский велосипед»,  Лилия Никифорова — «Заснеженные ели»,  Сайаана Сергучева —  «Кэрэмэс».

Антологияҕа сорохтор бэйэлэрин тиэмэлэрин булбатахтарынан, Александра Алексеева Далан “Глухой Вилюй”, Милана Васильева Чингиз Айтматов «Пегий пёс бегущий краем моря”,  Тамара Петрова «Эскимосские сказки» айымньыларга тохтоотулар.

Аттестация судаарыстыбаннай хамыыһыйатын  мунньаҕар  дипломнай бырайыактар быыстапкаларын тэрийэргэ этии киирдэ. Мин санаабар, быыстапка Национальнай бибилэтиэкэҕэ тэриллиэн сөп.

Аита ШАПОШНИКОВА, тылбаасчыт, литература кириитигэ