Антон Никаноров сырдык кэриэһигэр “Сулус” байыаннай-спортивнай күрэхтэһии

Мэҥэ Хаҥалас улууһун II Наахара нэһилиэгэр маҥнайгынан биир дойдулаахпыт,  байыаннай дьайыы кыттыылааҕа, Наахара орто оскуолатын 1996 сыллаах выпускнига, “Бойобуой үтүөлэрин иһин” уонна “Хорсунун иһин” мэтээллэрдээх Никаноров Антон Васильевич сырдык аатын үйэтитэр сыаллаах улуустааҕы “Сулус” байыаннай-спортивнай күрэхтэһии буолла.

Күрэхтэһиигэ улуус дьокутааттарын сэбиэтин  бэрэссэдээтэлэ Андросов И.И., улуус үөрэҕириигэ салаатын салайааччытын үөрэх чааһыгар солбуйааччы Апросимова Э.А., байаҥкамааттан  Устинов А.А. уонна I Наахара нэһилиэгин баһылыга Исаков И.К. ыалдьыттаатылар.

Тэрээһини нэһилиэкпит баһылыга Петр Никитин  эҕэрдэ тылынан аста. Күрэхтэһиини кадетскай корпус майора, СӨ үөрэҕириитин туйгуна Петр Васильев салайан ыытта.

Барыта үс хамаанда кэлэн күөн көрүстэ. Ол курдук, Майатааҕы лиссиэй “Дохсун”, В.Ларионов аатынан Майа орто оскуолатын “Беркут”, И.И.Платонов аатынан Наахара орто оскуолатын “Эрэл” хамаандалара кытыннылар. Үһүөн барыта 7 көрүҥҥэ күрэхтэстилэр. Түмүккэ Наахара орто оскуолата  бастаата. Майатааҕы лиссиэй – иккис. Майа орто оскуолата – үһүс буоллулар.

Күрэхтэһии кыайыылаахтарыгар Антон ийэтэ Римма Николаевна, кэргэнэ Февронья Анатольевна, бииргэ төрөөбүт бырааттара, бойобуой доҕотторо, оскуолаҕа бииргэ үөрэммит оҕолоро, үөрэммит кылааһын салайааччыта Раиса Кычкина, “Доблесть” бойобуой дьайыы бэтэрээннэрин түмсүүтэ, уола Алик бииргэ үөрэммит оҕолоро, кылаас салайааччыта Нина Ларионова, оҕо сааһын доҕотторо — Халдьаайы уолаттара уонна хаан-уруу аймахтара харчынан бириэмийэлэри туттардылар.

Тэрээһиҥҥэ кэлбит дьоммутун бука барыларын уонна күрэхтэһээччи оҕолору Антон Васильевич  дьиэ кэргэнэ, аймахтара минньигэс астаах сандалыга ыҥыран, ону тэҥэ “саллаат хааһытынан”, итии миининэн күндүлээтилэр. Ыҥырыылаах ыалдьыттарга анал бэлэхтэрин — харысхаллары туттардылар.

“Сулус” байыаннай-спортивнай күрэхтэһии  кыайыылаахтарын эҕэрдэлиибит! Мэлдьи бу курдук олоххо көхтөөх буолуҥ, ситиһиилэр кэлэ турдуннар!

Бу биир улахан тэрээһини тэрийэргэ күүс-көмө буолбут дьоммутугар, Антон аатын үйэтитэн спонсордаабыт чугас дьонугар, доҕотторугар, салайан ыыппыт Васильев Петр Васильевичка, хаартыскаҕа түһэрэн үйэтиппит Никонов Николайга махтанабыт!.

Никаноровтар аймах.