Арассыыйа Баана сүрүн ыстаапканы 15%-тан 14,5% диэри намтатта

Муус устар 24 күнүгэр буолбут Дириэктэрдэр сэбиэттэрин мунньаҕын түмүгүнэн, Арассыыйа киин Баана сүрүн ыстаапканы сылга 15%-тан 14,5%-ҥа диэри намтатта.

«Российская газета» иһитиннэрэринэн, бу ааспыт сыл бэс ыйыттан ахсыс, оттон 2026 сылга үһүс субуруччу намтатыы буолар. Маны ырыынак кыттыылаахтара эрдэттэн сабаҕалаабыт буолан, аналитиктарга соһуччу сонун буолбата.

Исписэлиистэр этэллэринэн, инфляция уонна экэниэмикэ балаһыанньата регулятор сабаҕалааһынын чэрчитинэн сайдар, оттон нэһилиэнньэ инфляция үрдүө диэн күүтүүтэ намтаабыт (ол эрээри син биир үрдүк таһымҥа хаалар).

Сорох аналитиктар Чугас Илиҥҥэ  буола турар айдаантан тахсар тас кутталлары уонна дойду бүддьүөтүгэр биллибэт балаһыанньа баарын учуоттаан, ыстаапка урукку 15% оннугар хаалыан сөп диэн сабаҕалаабыттара да, Баан ону 14,5% диэри түһэрдэ (санаттахха, кулун тутардааҕы мунньахха ыстаапка эмиэ 0,5 бырыһыанынан түспүтэ).

Сыана үрдээһинэ (Росстат дааннайа):

• Муус устар 7 күнүттэн 20 күнүгэр диэри туттуллар табаар сыаната 0,01% эрэ үрдээбит.
• Ый саҕаланыытыттан муус устар 20 күнүгэр диэри сыана үрдээһинэ 0,18% буолбут.
• Оттон быйылгы сыл саҕаланыытыттан — 3,16% тэҥнэспит.

Инникитин туох күүтүллэрий?

Киин Баан сүрүн сценарийынан, 2026 сылга орто сүрүн ыстаапка 13,5–14,5% иһинэн буолуохтаах. Арассыыйа Баанын сабаҕалааһынынан, 2026 сыл иккис аҥарыгар инфляция 4% тула олохсуйуоҕа.

Дириэктэрдэр сэбиэттэрин сүрүн ыстаапкаҕа аналлаах салгыы мунньаҕа 2026 сыл бэс ыйын 19 күнүгэр былааннанар.