Арассыыйаҕа аҕыйах ахсааннаах төрүт олохтоох норуоттарын күнүнэн!

Муус устар 30 күнүгэр биһиги РФ Бэрэсидьиэнэ Владимир Владимирович Путин Ыйааҕынан олохтоммут суолталаах күнү бастакытын бэлиэтиибит.

Судаарыстыба таһымыгар ылыныллыбыт ыйаах төрүт олохтоох норуоттар биһиги дойдубут устуоруйатыгар, култууратыгар уонна инникитигэр ураты оруоллаахтарын тоһоҕолоон көрдөрөр. Саха сиригэр бэлиэ күн ураты суолталаах, тоҕо диэтэххэ биһиги сирбитин-уоппутун төрөөбүт тылларын, өбүгэ үгэстэрин, олохторун-дьаһахтарын уонна айылҕалыын быстыспат ситимнэрин харыстаан илдьэ сылдьар норуоттар үйэлэр тухары олохсуйан олороллор.

Биһиги аҕыйах ахсааннаах төрүт норуоттар тустарынан саҥарарбытыгар, бастакынан, күннээҕи сыралаах үлэлэринэн, аҕа көлүөнэ муударай өйүнэн уонна кэнчээри ыччакка кыһамньыларынан көлүөнэлэр тыыннаах ситимнэрин, өбүгэ үгэһин уонна төрөөбүт сиргэ-уокка ытыктабылы харыстаан илдьэ сылдьар дьон туһунан этэбит. Чопчу кинилэр үтүөлэринэн култуура дьиэ кэргэҥҥэ, общинаҕа, үлэҕэ уонна күннээҕи олоххо тыыннаах илдьэ сылдьар. Төрүт норуоттар өрөспүүбүлүкэ сайдыытыгар ураты кылааттарын киллэрэллэр уонна Саха сирин элбэх омуктаах култууратын байыталлар.

Биһиги сорукпут — олох төрүтүн харыстааһын, үгэс буолбут олоҕу-дьаһаҕы, төрүт уус общиналарын, Арктика сирдэрин-уоттарын сайдыытын өйөөһүн уонна дьон бэйэлэрин сирдэригэр-уоттарыгар дьоһуннаахтык олороллоругар, үлэлииллэригэр усулуобуйаны тэрийии.

Саха сирин аҕыйах ахсааннаах төрүт норуоттарын бэрэстэбиитэллэригэр өбүгэ үгэһигэр бэриниилээхтэрин, сыралаах үлэлэрин, муударай өйдөрүн уонна төрөөбүт сиргэ тапталларын иһин ис сүрэхпиттэн махтанабын! Төрүт норуоттар баай утумнара — бүтүн өрөспүүбүлүкэ уонна Арассыыйа үрдүнэн сүүнэ улахан сыаннаһынан буолар. Кытаанах доруобуйаны, дьолу-саргыны уонна сарсыҥҥы күҥҥэ эрэллээх буолууну баҕарабын!

СӨ Ил Дархана Айсен Николаев