Ариан Иванов тимирбит массыынаттан оҕону быыһаабыта
Быйыл атырдьах ыйын 20 күнүгэр сарсыарда Уус Алдан улууһун Арыылаах сэлиэнньэтин таһыгар Toyota Ipsum массыына суолтан туораан, түҥнэстэн ууга түспүт. Быһылаан кэмигэр массыына иһигэр сэттэ киһи баар эбит. Биэс киһи быыһаммыт.
Ариан Иванов — «СӨ ОДьКХ» тэрилтэ производственнай салаатын машиниһа, Өлтөх нэһилиэгин төрүт олохтооҕо. Кини ити кэмҥэ матасыыкылынан чугастааҕы нэһилиэккэ айаннаан испит. Буолбут быһылааны көрөөт, тута тохтоон, ууга ыстаммыт уонна тимирэн эрэр массыынаттан дьону таһаартаан саҕалаабыт. Туоһулар кэпсииллэринэн, массыына түгэх муннугар оҕо хаалан хаалбыт. Ариан Афанасьевич хорсун, суһал дьайыыларынан алта саастаах уолчаан тыынын өрүһүйбүт, онтон атын пассажирдар кэмигэр көмөнү ылбыттар.
«СӨ ОДьКХ» судаарыстыбаннай унитарнай тэрилтэ Уус Алданнааҕы филиалыгар Ариан Иванов былырыын балаҕан ыйыттан үлэлиир, оттон ОДьКХ эйгэтигэр уопсайа 10-ча сыл кэриҥэ үлэлээбит. Кэлэктиип кинини идэтигэр үрдүк таһымнааҕын, туруоруллубут соруктары толорууга эппиэтинэстээхтик сыһыаннаһарын уонна табаарыстарыгар өрүү көмөлөһөргө бэлэмин иһин сыаналыыр.
Кини төрөөбүт дойдутун уонна тэрилтэтин олоҕор көхтөөхтүк кыттар. Мас тардыһыытыгар уонна гиирэ успуордугар күрэхтэһиилэр хас да төгүллээх кыайыылаахтара, анал оскуола-интэринээт үөрэнээччилэрин ортолоругар өрөспүүбүлүкэтээҕи күрэхтэһиилэр кыайыылаахтарын иитэн таһаарбыта.
Сообщить об опечатке
Текст, который будет отправлен нашим редакторам: