Арктика олохтоохторугар авиабилиэттэри субсидиялааһын боппуруоһа салгыы көрүллүөҕэ

Алтынньы 21 күнүгэр Ил Түмэн пленарнай мунньаҕар норуот дьокутааттара Саха сирин 2027 сыллааҕы уонна 2028–2029 сыллардааҕы былааннанар кэмҥэ судаарыстыбаннай бүддьүөт барылын бастакы ааҕыыга көрдүлэр.

Бу иннинэ Саха сирин парламеныгар буолбут аһаҕас дьүүллэһиигэ бүддьүөт барылыгар Арктика улуустарын олохтоохторугар авиабилиэттэри субсидиялааһыҥҥа үп-харчы көрүллүбэтэҕигэр болҕомтолорун уурбуттара. Бүддьүөт кээмэйдэрэ өссө да чопчуланыахтара. Ил Түмэн сис кэмитиэтин бэрэссэдээтэлэ Елена Голомарева сүрүн үп докумуонун салгыы үлэлэһиигэ субсидиялааһын боппуруоһун өрөспүүбүлүкэ бырабыыталыстыбатын кытта бииргэ дьүүллэһиэххэ наада диэн бэлиэтиир.

«Билигин биһиги бүддьүөтү бастакы эрэ ааҕыыга көрдүбүт. Көдөрүүлэрэ федеральнай бүддьүөт оҥоһуллуутун уонна эрэгийиэннэргэ үп-харчы өттүнэн өйөбүл кээмэйэ быһаарыллыытын учуоттаан чопчуланыахтара. Онон сокуон барылыгар үп-харчы көрүллүбэтэҕэ авиабилиэти субсидиялааһыны тохтотоппот», — диэн бэлиэтээтэ дьокутаат.

Елена Голомарева этэринэн, Арктика олохтоохторугар тырааныспарынан сырыы ураты суолталаах. Элбэх нэһилиэнньэлээх пууннарга авиация атын сирдэри кытта төгүрүк сыл устата ситимниир соҕотох суолунан буолар. Көтүү сыаната олохтоохтор мэдиссиинэ көмөтүн туһаналларыгар, үөрэнэллэригэр уонна күннээҕи боппуруостары быһааралларыгар быһаччы дьайар.

Бүддьүөтү салгыы үлэлэһиигэ олохтоохтор наадыйыыларын уонна өрөспүүбүлүкэ бүддьүөтүн кыаҕын учуоттаан, Саха сирин бырабыыталыстыбатын кытта бииргэ үбүлээһин кээмэйин, субсидияланар маршруттар испииһэктэрин уонна чэппэтиилээх билиэти биэрии усулуобуйатын быһаарар наадалааҕын дьокутаат бэлиэтээтэ.